Kawm TSWV NTUJ LO LUS.

Thawj nqi :
1. Nej yuav txiav siab tias nej xav ntseeg Tswv Ntuj lo lus.
2. Nej yuav txiav siab tias nej yuav npaj txais lub Cim Ntxuav, vim yog lub cim tias yuav txais kev ntseeg tiag.
Nqi ob : Vim li ntawd, nej xyiv fab kawm txoj kev uas Tswv Ntuj qhia rau peb taug, nej thiaj nrog nws tsim lub ntuj lub teb tshiab xis nws siab.
Nqi peb : Peb yuav kawm Tswv Ntuj zaj tswv yim raws tus txheej txheem twg ? Peb yuav kawm raws li Tswv Ntuj tau qhia rau peb lub ntiaj teb txij lub hauv paus los.
Yam li peb yuav kawm tias Tswv Ntuj qhia dab tsi ?
- Rau Has Nplas.
- Rau Mais Xes.
- Rau cov vaj Hias Xas Lais.
- Rau cov yaj saub.
- Rau nws cov His Xas Lais tib si.
Nqi plaub : Thaum peb kawm zaj tswv yim uas Tswv Ntuj qhia, puag txheej thaud los li ntawd, mas peb yuav pom tias yog ib zaj tswv yim zoo pab coj peb lub neej nyem no. Tsis yog tej lo lus kav txheej thaud xwb, tiam sis yog tej lo lus kav neeg lub neej mus li, xws li cov lus uas Tswv Ntuj qhia rau Mais Xes, los cov lus uas Tswv Ntuj hais rau cov Yus Das, mas yog ib co lus zoo qhia peb hnub no thiab tseem yuav zoo qhia mus ib txheeb ib txhis.
Nqi tsib : peb yuav kawm li 48 zaj tom ntej no, peb thiaj paub kev ntseeg lub ntsiab. Ces peb mam txais lub Cim Ntxuav.
Nqi rau : Peb kawm zaj twg, mas peb ua zoo li no : 
Peb xub saib nyob hauv peb lub neej tias, yog muaj yam uas peb niaj hnub ntsib, los niaj hnub raug, los niaj hnub yuav tsum txiav siab txog. Yam li, niaj hnub peb pom cov neeg sib ncaim, nyias muaj nyias tus Huab Tais, tsis sib koom siab koom ntsws. Los niaj hnub, peb pom cov neeg paub tias muaj Tswv Ntuj, tab sis lawv tsis txawj mloog Tswv Ntuj lus.los niaj hnub, peb pom cov neeg ntshaw txog nyiaj txiag, saib nyiaj txiag yog xws li Huab Tais. 
Peb pib kawm kev ntseeg lub ntsiab hnub twg, mas peb yuav xub saib ib yam zoo li ntawd nyob hauv peb lub neej.
Ces peb saib tias, Tswv Ntuj hais lo lus twg txog yam ntawd, uas peb pom nyob rau hauv peb lub neej. Yam li, hais txog qhov neeg sib ncaim, nyias muaj nyias Huab Tais, Tswv Ntuj tau hais dab tsi rau Has Nplas.
Ces peb saib tias, cov lus uas Tswv Ntuj tau hais rau Has Nplas, zoo qhia dab tsi rau ntiaj teb neeg.
Ces peb saib tias, peb yuav coj peb lub neej zoo li cas, peb yuav kho peb lub neej zoo li cas thiaj haum Tswv Ntuj lo lus, thiab haum tus piv txwv uas Tswv Ntuj pub rau peb.
Nqi xya : Peb kawm Tswv Ntuj lo lus li ntawd thaum twg, mas peb kuj yuav thov Tswv Ntuj, pub lub siab tsim nyom txais lub Cim Ntxuav rau peb. Vim peb nco ntsoov tias, lub caij peb npaj txais lub Cim Ntxuav, tsis yog ib lub caij kawm xwb, tiam sis yog ib lub caij uas peb yuav saum coj ib lub siab tshiab thiab. Li ntawd, peb thiaj yuav vam txog Tswv Ntuj li txiaj ntsim pab peb tig los yuav lub siab tshiab.