11 YAM UAS PEB YUAV TSUM KAWM NYOB HAUV NTAWV NTSHIAB 1

Wednesday, January 29, 2020

Vim li cas peb thiaj yuav tsum kawm Ntawv Ntshiab ua ntej ?
Peb xav tau dab tsi los ntawm kev kawm Ntawv Ntshiab.
Peb tig los xav txog 11 yam uas tsim nyog peb yuav tsum paub.
(1) Kev ntseeg.
Nyob hauv Tis Mos Tes tsab ntawv ob zaj 3 qib 16, peb yuav pom tias : kev kawm los sis nyeem Ntawv Ntshiab muaj 4 yam ua ke. Thawj yam yog kev ntseeg, kev ntseeg yog thawj qib nyob hauv peb. Kev ntseeg yog lub noob ntawm txoj kev ntseeg uas cov neeg ntseeg txhua tus yuav tsum paub thiab coj nyob hauv lub neej. Txhua tus neeg ntseeg yuav tsum paub txog Ntawv Ntshiab thiab muaj cov thawj coj nyob hauv lub Koom Txoos lees txais, mas thiaj yog txoj ntseeg tiag. Yog peb xav paub tias peb yuav ntseeg dab tsi thiab vim li cas peb thiaj ntseeg, mas peb yuav tau muab siab rau nyeem Ntawv Ntshiab. Peb txhua tus yuav tsum paub thawj qib kev ntseeg uas peb cov neeg ntseeg yuav tsum paub tias kev ntseeg yog dab tsi, thiab muaj dab tsi tseem ceeb nyob hauv Ntawv Ntshiab.
(2) Kev qhuab qhia thiab daws kho.
Kev nyeem Ntawv Ntshiab ua kom peb paub tias : txoj kev ntseeg uas peb ntseeg ntawd yog los tsis yog. Qee zaus cov lus nyob hauv Ntawv Ntshiab qhia peb lub sij hawm peb tab tom yuam kev, yam li ib tug neeg tab tom chim rau nws tus phooj ywg, tab sis nws nco txog lo lus nyob hauv Ntawv Ntshiab tias : “Koj yuav zam txim 7X70 zaug”, ces nws yuav rov thim xav txog qhov nws chim rau nws tus phooj ywg thiab nws lub siab yuav txias. (MT 18 : 22)
Nyob hauv peb lub neej, dhau ntawm qhov muaj tus nyiam peb thiab qhuab qhia peb lawm, kev nquag nyeem Ntawv Ntshiab kuj tseem pab kom peb txawj xav txog peb tus kheej thiab cheem peb lub siab kom txhob ntseeg tej yam yuam kev. Ntawv Ntshiab qhia kom peb txawj daws kho peb tus kheej, peb thiaj tsim nyog muab cov lus nyob hauv Ntawv Ntshiab los ua ib co lus ntuas peb, kom peb txawj daws kho peb tus kheej tiag. Kev nyeem Ntawv Ntshiab pab kom peb txawj hloov peb tus kheej los ua neeg zoo nyob hauv Tswv Ntuj. Kom peb txhob yoog raws ntiaj teb txoj kev ntshaw, kom peb hloov peb tus kheej txoj kev xav dua tshiab, ces peb thiaj yuav paub txog Tswv Ntuj lub hom phiaj nyob hauv Ntawv Ntshiab. Peb yuav paub tias yam twg zoo yam twg phem, thiab txawj ua Tswv Ntuj cov me nyuam.
(3) Xyaum coj lub neej mus raws txoj kev ncaj.
Thawj kauj ruam nyob hauv kev ua ib tug neeg ntseeg, mas yog ib qho peb tsis to taub, tab sis nws muaj kev zoo siab thiab txhib peb lub siab kom peb txoj kev ntseeg tau txais kev dim ntawm txhua txoj kev ua txhaum. Thiab yuav ua kom peb txawj xav txog peb lub neej ua neeg ntseeg yuav coj zoo li cas. Yam uas peb coj yav tag los thiab yam uas lwm tus coj, peb puas yuav coj tau li luag. Peb yuav ua yam twg thiab coj li cas thiaj haum Tswv Ntuj siab. Peb muaj ntau lo lus nug nyob hauv peb lub neej, tab sis lo lus uas peb kheev kheev nug peb tus kheej yog lo lus hais tias peb yuav ua li cas ? Kev kawm Ntawv Ntshiab txhua hnub, mas peb yuav cia Leej Ntuj Plig Ntshiab uas tus coj, kom cov neeg txais kev ntseeg tshiab thiab peb cov ntseeg los ntev lawm tau paub txog kev ua lub neej mus raws qhov tseeb.
(4) Zam kev ua txhaum.
“Kuv yuav khaws Tswv Ntuj cov Lus tseg hauv nruab siab, kom kuv tsis txhob ua txhaum rau Tswv Ntuj.” (CPL 119 : 11)
Tshuav ib yam kev qhuab qhia uas yuav pab kom peb txawj coj lub neej nyob hauv txoj kev ncaj ncees, yog kev qhuab qhia kom peb txawj zam kev ua txhaum. Ntawv Ntshiab tsis tau qhia kom peb ua dab tsi, tab sis Ntawv Ntshiab qhia tias dab tsi yog qhov peb yuav tsum zam. Yog peb ua tib zoo nyeem Ntawv Ntshiab kom xwm yeem, mas txhua lo lus nyob hauv Ntawv Ntshiab yuav nkag mus nyob hauv peb nruab siab, ces Tswv Ntuj cov lus nyob hauv peb nruab siab yuav pab kom peb lub siab ruaj khov rau yam peb ua thiab Tswv Ntuj cov lus yuav yog ib nrab ntawm peb tus kheej.
Ib yam uas hais txog kev coj ncaj ncees ntawm peb lub neej, mas yog peb yuav txawj zam txhob ua txhaum, vim Tswv Ntuj cov lus nyob hauv Ntawv Ntshiab qhia kom peb yeej kev txhaum. Peb muaj Tswv Ntuj cov lus, mas zoo li peb nyob ze Tswv Ntuj. Tswv Ntuj cov lus zoo li ib txoj xov hluav taws xob uas txuas peb nrog Tswv Ntuj ntag.
(5) Qhia txog txoj kev ua neej.
“Tswv Ntuj cov lus yog lub teeb tsom hauv txoj kev peb mus, yog qhov pom kev ci kaj peb txoj lw.” (CPL 119 : 105)
Nyob hauv Ntawv Ntshiab peb nrhiav tau lo lus teb thiab lo lus kawg nyob hauv peb lub neej. Tswv Ntuj lo lus yog lub teeb tsom peb txoj hau kev uas peb taug, ces peb yuav pom tias txoj kev twg yuam kev thiab txoj kev twg tsis yuam kev. Txoj kev twg tsim nyog peb yuav zam thaum peb ntsib teeb meem. Ntawv Ntshiab muaj qee ntu nws tshwm sim nyob hauv peb lub neej. Thaum peb raug xwv txheej, mas lo lus teb yog nyob hauv Ntawv Ntshiab. Zoo yam li thaum peb tshaib plab, mas peb nrhiav txhiam laj txhiam xws noj tau nyob hauv Ntawv Ntshiab. Tsis yog peb yuav tos txog thaum peb tag kev cia siab lawm, peb mam li los zaum nthuav Ntawv Ntshiab saib. Yog peb tsav tsheb hmo ntuj, mas peb yeej yuav taws teeb xwb. Peb yuav tsis tos txog thaum peb ntsib teeb meem lawm, peb mam los taws teeb. Nyob hauv peb lub neej kuj yog zoo li ntawd, peb yuav tsis tos txog thaum peb ntsib teeb meem lawm peb mam los nthuav Ntawv Ntshiab. Tswv Ntuj xav kom peb mus nrog Tswv Ntuj qhov pom kev uas yog Tswv Ntuj lo lus.