7 YAM TXHAUM UAS PEB YUAV XAV TXOG THIAB DAWS KHO

 (1) Xam khib tsis paub cheem tus kheej, muab hlob khib oom, khav theeb thiab xav tias yus yog tus zoo tshaj, ntseeg tus kheej thiab yuav li tus kheej xav, hais lus loj thiab khav theeb, tsis mloog lwm tus hais, npau taws sai, tawv ncauj, chim taus, siab me thiab tsis paub txog qhov tus kheej ua tias zoo los tsis zoo. 
(2) Saib tus kheej tseem ceeb thiab loj dua, xav tau txhua yam tsis pub rau leej twg, tsis khuv leej luag tej, siab nqaim, xav tswv yim dag, ntxias neeg, zais tus kheej tsis pub luag tej paub, tsis nyiam pab luag tej tab sis xav kom luag pab yus, ntshaw ub ntshaw no thiab huab noj huab haus.
(3) Nyiam kev plees kev yi, xav pom xav paub, tso lub siab ntshaw ub ntshaw no, nrhiav tsis paub txaus, pob ntseg sib, siab ywj fab ywj fwj, hais lus tsis xav tom ntej tom qab, hais lub chob siab, tsis hwm luag tej, hnav khaub ncaws ua dog dig, qias neeg vuab tsuab, tsis txawj cheem lub siab.
(4) Khib thiab ntxub luag tej, xyav luag tej moo, iab hiam luag tej, rhuav luag tej ntsej muag, hais lus thuam luag tej, hais lus sib chob, zoo siab thaum lwm tus raug kev txom nyem, khib thaum lwm tus tau zoo, txwv txiav thiab tsis lees qhov nws ua. 
(5) Ntshaw noj ntshaw haus, xav thiab tsuas hais txog qhov noj, xav noj tsis xav ua thiab yws taus, tsis txaus siab rau yam nws muaj, noj tsis hu thiab tsis tseg rau leej twg, quav dej quav cawv, haus npaum cas tsis txaus, xav tau noj txhua lub sij hawm. 
(6) Kev chim, kev ntxub thiab tsis nyiam luag tej, chim rau nruab siab, tsis txaus siab, cib nyeej, xav pauj yog kev tswj tsis tau lub siab.
(7) Tub nkeeg, ntsoos, qeeb, ua xyem xyav, tsis muab siab rau, thaub qab yog kev tsis quav ntsej txog yus tej hauj lwm. Ua tsis xwm yeem, ua raws yus siab, lam ua xwb tsis yog ua tiag, xav thiab ua yooj yim, ua tsis raws caij nyoog.
txhua yam no yog los ntawm kev txhaum. Yog leej twg muaj 7 yam no nyob hauv nws, mas yuav tau ua tib zoo zaum xav thiab rov daws kho tus kheej kom zoo tuaj. 

Tus sau : Lis Maib, Zoo Tswv Zov Yaj