CEV TUS ME NYUAM YES XUS HAUV LUB TUAM TSEV TEEV NTUJ

Cov His Xais Lais muaj txoj cai tias txhua tus me nyuam tub xub yug, yuav muab qee rau Huab Tais. Thiab muaj ib txoj cai hais tias tus poj niam nyuam qhuav yug me nyuam mas yuav caiv tsis mus hauv lub Tuam Tsev Teev Ntuj 40 hnub. Dhau caij caiv lawm leej niam mam coj tus me nyuam nrog ib nkawg nquab lwb rwg los ob tug thav nquab dawb mus txi rau Ntuj them txim txhaum.  

Mab Liab thiab Yos Xes thiaj coj tus me nyuam Yes Xus mus pem Yes Lus Xas Les kom tau cev tus me nyuam rau Tswv Ntuj. Nyob hauv Yes Lus Xas Les, muaj ib tug txiv neej hu ua Xis Mes Oos, nws yog neeg ncaj thiab nyiam teev Ntuj, ces Leej Ntuj Plig tshoj nws kom paub tias nws tsis tau pom Huab Tais tus Pleev, mas nws yuav tsis tuag.

Hnub ntawd, Leej Ntuj Plig coj Xis Mes Oos tauj nyob hauv lub Tuam Tsev Teev Ntuj, ces Xis Mes Oos thiaj txais tus me nyuam Yes Xus los rau hauv nws ob txhais npab, nws cav lus zoo txog Tswv Ntuj tias “Huab Tais, nyem no koj tso koj tus tub txib mus kaj lug, raws li koj lo lus, vim kuv qhov muag tau pom koj txoj kev cawm neeg uas koj npaj nyob ntawm ib tsoom haiv neeg xub ntiag, yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej.” (LK2:29-32)

Nyob hauv lub Tuam Tsev Teev Ntuj, txawm muaj ib tug pog laus hnub nyoog 84 xyoos hu ua As Nas, Fas Nus Es tus ntxhais. Nws yoo mov thiab teev Ntuj los hawm Tswv Ntuj thawm hnub thawm hmo, nws tsis nrug ntawm lub Tuam Tsev Teev Ntuj li. As Nas pom li ntawd, nws kuj cav lus zoo txog Tswv Ntuj, nws hais txog tus me nyuam rau txhia leej txhia tus nyob hauv Yes Lus Xas Les.

Kab ke ua hmoov nco txog cev tus me nyuam Yes Xus hauv lub Tuam Tsev Teev Ntuj yog pib los ntawm lub Koom Txoos sab hnub tuaj. Xyoo 528 tau muaj av qeeg ua rau neeg tuag coob nyob hauv As Thias Kias, thiab xyoo 541 muaj kab mob sib kis nyob hauv Koos Tas Tis Nos Pos Lis ua rau neeg tuag ntau txhiab leej, ces cov ntseeg thiaj sib txoos thov Ntuj kom tshem cov xwv txheej no mus. Hnub uas tej xwv txheej no dhau mas ncaj rau hnub ua hmoov cev tus me nyuam Yes Xus hauv lub Tuam Tsev Teev Ntuj ntag, ces txij ntawd los cov ntseeg thiaj niaj xyoo ua hmoov los txog niaj hnub no.