HNUB TXAIS TSHAUV (Ash Wednesday)

Hnub Txais Tshauv yog Hnub Plaub hauv Thawj Lis Piam hauv Caij Plaub Caug. Yog li thiaj yog hnub chiv ntawm Caij Plaub Caug.
Nyob rau xyoo 325 cov Tswv Qhia tuaj sib sau hauv lub rooj ncauj lus Nis Ches As, lawv tau hais txog 40 hnub ua ntej yuav txog Caij Hla tias yog ib txoj kab ke ntshiab, yog li 40 hnub no los yog 6 lis piam ua ntej yuav txog Caij Hla mus txog rau Hnub Tsib Ntshiab mas cov ntseeg yuav tsum yoo mov. Vim thaum ub Huab Tais Yes Xsu tau yoo mov thiab thov Ntuj txog 40 hnub hauv teb chaws suab puam, mas cov ntseeg yuav tsum yoog raws li Huab Tais Yes Xus tau ua tseg.
Ob peb tiag tom qab, nyob hauv tuam ceeb Los Mas, lawv tau ua Cim Ntxuav rau cov ntseeg tshiab nyob hauv Hnub Hla. Cov neeg muaj txim hnyav mas lawv yuav tsum npaj tus kheej kom ntev hauj sim nyob hauv Caij Plaub Caug. Lawv yuav tsum sib sau nyob ua ke hauv Hnub Plaub ua ntej ib lis piam yuav txog Caij Plaub Caug. Nyob hauv hnub no Tswv Qhia yuav ua ib lub Cim Ntshiab rau lawv; yog nphoo tshauv rau saum lawv taub hau. Lawv yuav tso nyob li ntawd mus kom txog Hnub Tsib Ntshiab mas mam muab ntxuav tawm. Qhov ntawd yog ua lub cim qhia tias tus neeg ntawd nws tab tom tu siab rau nws cov txhaum.
Tom qab no cov ntseeg pom tias yog ib yam zoo, mas lawv thiaj thov kom Tswv Qhia nphoo tshauv rau lawv thiab. Yog li nyob hauv tiam 11 Vaj Qhia thiaj tso cai rau cov Tswv Qhia pleev tshauv rau saum sawv daws hauv pliaj. Lawv hais tias yog ‘Txais Tshauv.’