IB TUG TSEEM TUB TSHAJ NTUJ LUS YUAV COJ TUS YAM NTXWV ZOO LI CAS? (3)

IB PAB NEEG TWG TXAIS LUB MOO ZOO: YUS MAM LI TSHAJ NTUJ LUS RAU LAWV HAIS TXOG TXOJ KEV CAWM. YAM LI YUS YOG COV NTSEV LAS LUB NTIAJ TEB. YUS YOG LUB TEEB CI RAU LUB NTIAJ TEB

Yuav muab 5 tus neeg 5 zaj lus lawv hais zoo li no:

1. Tas tsoom neeg hauv lub qab ntuj, lub caij nram ntej thiab lub zim txwv no, mas lawv sawv daws nrhiav saib lub hauv paus hauv ntsis ntawm peb lub neej yog dab tsi? Qhov tseeb hauv peb lub neej yog dab tsi? Nyob tsam lawv tsis pom qab nrhiav ib lo lus teb, ces lawv ntaus siab yau - lawv kuj mag kev ntshai – lawv maub qhov tsaus ntuj. Hos ntawm peb tsoom ntseeg txog lub Moo Zoo, mas peb zoo siab tshaj lus no tias: Huab Tais Yes Xus yog lo lus teb. Nws yog tus tseem kws tshuaj pab kho neeg tej nplooj siab nplooj ntsws. (Vaj Qhia tsab ntawv rau tas tsoom Tswv Qhia thiab cov Kav Tos Liv sawv daws nyob sab As Xias, Ecclesia in Asia)

2. Ntawm peb tsoom ntseeg mas peb tshaj lus tseg tias peb nyob kaj siab lug ua Leej Pleev cov thwj tim. Peb tseem tshaj lus tias “Tswv Ntuj caw tas tsoom neeg sib sau los ua ib tsev neeg.” (Card. Darmaatmadja)

3. Thaum Yes Xus tshaj lub Moo Zoo, mas cov neeg As Xias ntawd, lawv qhuas txog Yes Xus lo lus, vim nws hais lus muaj hwj chim. (LK4:3) Zam Ntawv Moo Zoo hais tias: Cov zov keeb rov qab los cuag cov thawj Leej Choj thiab cov Fas Lis Xais. Cov Fas Lis Xais hais rau cov zov keeb tias “Vim li cas nej tsis coj Yes Xus los ntawm no?” Cov zov keeb teb tias “Tsis muaj leej twg hais lus zoo cuag li Yes Xus ib zaug.” (Z7:45-46) Txhais tias Huab Tais Yes Xus lub Moo Zoo raug cov neeg As Xias ntawd siab, rau qhov tias Yes Xus lo lus yog ib tug dej txhawv muaj txoj sia mus li nyob hauv lawv lub siab. (Z4:14) (Arch. Thomas Menamparampil. Assam, India)

4. Lub Koom Txoos Kav Tos Liv nyiam tshaj kev ntseeg raws luag txuj, tiam sis yuav tsum ua ceev faj kom txhob muab kev lawb dab los pauv kev teev dab xwb- Yuav tsum tau cais kom meej meej. Yuav tsum qhia tias peb lub cev tshiab yog ua dab tsi? (LTH. Lauj Vam Thaiv)

5. Kev teev dab mas yog kev ntiav nkaus xwb; tsuas muaj kev ntiav dab kom tuaj pab ua rog ntaus kom yeej, tiv thaiv ntu yus raug tuag xwb. Thov thov dab tuaj pab dim kiag koj txoj kev tuag, ces yus nyob twj ywm. Rov tsis paub txog dab lub txiaj ntsim lawm. (XH. Npuag Neeb)

Muab 5 zaj lus no los xaus lub ntsiab lus tau tias: Peb yuav coj lub neej nyob kaj lug los ua pov thawj tias peb yog Huab Tais Yes Xus cov thwj tim. Peb yuav tsis txaj muag txog lub Moo Zoo vim lub Moo Zoo yog Tswv Ntuj lub zog cawm tas tsoom neeg ntseeg. (LM1:16) Nej yuav tso nej tus yam ntxwv thaud tseg, nej cia zaj tswv yim tshiab los nyob hauv nruab siab, nej yuav hnav tus neeg tshiab. Ntuj tsim tus neeg tshiab ntawd raws li Huab Tais tus duab, Ntuj tsim nws nyob hauv txoj kev ncaj, kev ntshiab thiab qhov tseeb. (EFX4:22-24)

Tus yam ntxwv tshiab tshiab uas yog Leej Ntuj Plig Ntshiab ua tus tsim nyob hauv peb nruab siab, mas xam pom tus yam ntxwv ntawd yuav tsum mus zoo li no:

- Peb yuav taug txoj kev nyiam Tswv Ntuj thiab txoj kev nyiam tus nyob ze peb.

- Peb yuav taug txoj kev tso saiab lug rau Tswv ntuj tib leeg.

- Peb yuav nyob ruaj nreb khov kho hauv txoj kev ntseeg.