Lub Caij Hla yog dab tsi?

Lub Caij Hla yog dab tsi ?

Lub Caij Hla yog kev ua hmoov tsuj xeeb nco txog Yes Xus txoj kev tuag thiab 3 hnub nws sawv hauv txa rov qab los. Kev nco txog Huab Tais Yes Xus txoj kev sawv rov los, yog ib txoj kev ntxiv siav ntxiv zog rau peb txoj kev cia siab niaj hnub hais tias peb yeej peb cov txhaum, raws li nyob hauv Ntawv Cog Lus Tshiab mas lub Caij Hla yog 3 hnub tom qab Huab Tais Yes Xus tuag nyob saum ntoo cuam.

          Lub Caij Hla yog lub caij yoo, muaj ntau lub tsev teev Ntuj teem lub caij rau cov neeg ntseeg hloov siab thiab nco txog Huab Tais Yes Xus txoj kev tuag thiab sawv rov los. Lub caij yoo, mas yog nyob hauv lub Caij Plaub Caug suav txij hnub plaub txais tshauv los xaus rau hnub Huab Tais Yes Xus tuag nyob saum ntoo cuam. Vaj Qhia Nqes Nkos Lis tim 1 tau muab 40 hnub los nco txog 40 hnub ntawm cov His Xas Lais, ntawm  Mais Xes, ntawm tus Yaj Saub Es Lis Xais thiab ntawm Huab Tais Yes Xus raug dab phem ntxias. Lub lis piam kawg ntawm tas 40 hnub ntawd, mas yog lub lis piam Ntshiab. Hnub Tsib Ntshiab Huab Tais Yes Xus mus ua hmoov nyob hauv lub nroog Yes Lus Xas Les, thiab noj pluas hla nrog nws cov Thwj Tim. Hnub Rau Ntshiab yog hnub Huab Tais Yes Xus raug ntsia saum ntoo cuam.

          Hnub Chiv Hla thiaj yog ib hnub tseem ceeb nyob hauv lub Koom Txoos thiab yog lub hauv paus nyob hauv txoj kev ntseeg. Huab Tias Yes Xus yog Tswv Ntuj Leej Tub, nws tau ua raws Leej Txiv Lo Lus thiab nws zoo siab tuag nyob saum ntoo cuam kom tau pub txoj sia nyob mus li nyob saum ntuj, rau cov neeg ntseeg txog nws txoj kev tuag thiab kev sawv rov los. Thawj pab neeg ntseeg thaum ub ua hmoov hla nyob hauv lub 3 hlis thiab lub 4 hlis, vim yog cov His Xas Lais hnub noj pluas mov Hla yav tsaus ntuj. Vim li ntawd, Huab Tais Yes Xus thiaj nrog nws cov Thwj Tim noj pluas hla yog hnub kawg thiab nws raug ntsia saum ntoo cuam. Cov neeg ntseeg thaum ub thiaj ua hmoov hla nco txog HUab Tais Yes Xus zoo li tus yaj hla thiab yog tus cawm seej.

Ua ntej thawj hnub Huab Tais Yes Xus yuav raug ntsia saum ntoo cuam, mas Huab Tais Yes Xus tau ua nrog nws cov Thwj Tim noj pluas Hla uas peb hu tias pluas mov kawg “Last Supper”. Lub Caij Hla yog lub caij cov His Xas Las nco txog lawv tsoom poj yawm txwv koob His Xas Lais khiav dim los ntawm Hais Nkws Tos teb. Huab Tais Yes Xus tau muab lub ncuav mov mog los ua nws lub cev thiab muab cov kua txiv cawv los ua nws cov ntshav uas yuav ntws los daws neeg cov txhaum. (MT 26 : 17 – 30)

          Pluas mov kawg hnub no ua lub cim rau tsoom neeg ntseeg txog lub Cim Yug, ces nyob hauv lub thaj txi Ntuj thiaj faib lub Cim Yug thiab haus kua txiv cawv ua kev nco txog Huab Tais Yes Xus txoj kev tuag. Lub Caij Hla yog pib nyob hauv Hnub Chiv Hla. Nyob hauv lub Caij Hla nws kav tas 7 lub lis piam uas txwm 50 hnub. Lub Koom Txoos nyob sab hnub tuaj thiaj hu cov hnub nyoog no ua lub Caij Hla, yog ua hmoov nco txog Yes Xus nce mus saum ntuj.