LUB ZOG NTAWM TXOJ SAW MAB LIAB

Xyoo 1978, phau ntawv Maiv Kaum (Michel) tau sau txog txoj saw Mab Liab uas Niam Mab Liab tau hais rau Npas Npas Las (Barbara) uas yog neeg Pos Kas. Npas Npas Las tuag hnub tim 15 lub 1 hlis xyoo 1981. Thaum ntawd nws muaj 78 xyoo.
(1) Kev zoo siab hauv lub siab.
Niam Mab Liab hais tias ; Saw Mab Liab yog kev zoo siab hauv lub siab. Yog qhov chaw pom kev hauv yus lub tswv yim. Yog lub zog ntawm yus kev xav tau thiab yog txoj hlab txuas koj rau Ntuj Ceeb Tsheej. Txoj Saw Mab Liab yog yam muaj nqis zais ntshis. Niam muab rau koj, nws yog koj ib leeg txais thiab yuav hais txoj Saw Mab Liab, yuav txawj siv sij hawm, tsis muab hlob thiab siab zoo. Txawj cheem yus lub siab thiab txoj kev xav, ua lub siab tus lub caij yus thov Ntuj, lub caij koj hais zaj Saw Mab Liab txhob xav txog yam ub yam no. Txhob tos txog teev kawg nkaus ntawm ib hnub mam los hais zaj saw Mab Liab. 
(2) Yam muaj nqis uas Tswv Ntuj pub.
Niam Mab Liab hais tias ; txoj Saw Mab Liab yog ib yam muaj nqis ntawm Tswv Ntuj txoj kev hlub. Yog qhov nyob mus li tsis txawj ploj. Saw Mab Liab yog koj li thiab yuav nyob nrog koj mus tsis txawj kawg. Txhua lub sij hawm hauv koj lub neej thiab nyob hauv koj txhua txoj kev nyuab siab, seb koj puas xam pom qhov muaj nqis ntawm txoj Saw Mab Liab xwb. Kev hais txoj Saw Mab Liab yuav muaj kev tso siab thiab nquag. Saw Mab Liab yog tas cov neeg tsis muab hlob thiab lub siab npuab Tswv Ntuj tug. Yog Tswv Ntuj Leej Tub lub siab thiab yog kuv uas yog Leej Niam lub siab. Saw Mab Liab khi sawv daws kom los nyob hauv Tswv Ntuj txoj kev hlub, thiab sib koom ua ib tug nyob hauv txoj kev yeej. Cov uas nyiam kuv thaum lawv tseem muaj txoj sia nyob ntiaj teb, thiab cov zoo siab vim txoj kev yeej nyob hauv Tswv Ntuj lub Ceeb Tsheej.
(3) Kev pib ntawm Ntuj Ceeb Tsheej.
Huab Tais Yes Xus xav kom ntiaj teb neeg paub kuv coob coob, thaum kuv yees tawm tuaj nyob Fas Tis Mas. Niam Mab Liab hais tias : kuv xav kom Yes Xus txoj kev yeej nkag txawm rau nej tej siab ntsws, Huab Tais Yes Xus wb xav kom nej muaj kev kaj siab thiab tau nyob thaj yeeb thiab hom khaj nyob hauv Tswv Ntuj. Kuv yuav nyob hauv nej txoj kev cav txog Tswv Ntuj thiab thaum nej hais txoj Saw Mab Liab. Yog tias nej nquag hais txoj Saw Mab Liab, mas nej yuav ntsib kuv nyob hauv txoj Saw Mab Liab xwb.
(4) Txoj kev uas luv tshaj.
Kuv yog qhov tseeb, txhua lo lus kuv hais yog qhov tseeb thiab qhov ncaj. Kuv Leej Tub Yes Xus kuj hais tias : “Kuv yog qhov tseeb”. Tus twg nyiam Saw Mab Liab, mas tus twg nyiam qhov tseeb. Ces txoj kev xav no thiab nyob hauv tus neeg ntawd lub siab thiab nws lo lus. Tus neeg ua raws kuv cov lus qhia, mas nws yuav tsis ua txhaum. Tseem muaj ib lo lus hais ntxiv tias : “Kuv yog txoj kev luv tshaj ntawm qhov tseeb, uas yuav coj nej mus cuag Leej Tub thiab Leej Txiv”. Qhov no yog lub hom phiaj ntawm nej yuav tshaj txog txoj Saw Mab Liab.
(5) Cov tub rog sawv ua tsheej phiaj yog cov tub rog ntaus rog.
Kev nyob twj ywm ntsiag to xav ntawm txhua txhua tus neeg, nyias muaj nyias lub hom phiaj. Tab sis yog muab Tswv Ntuj 15 lo lus tob tog los sib ntxiv ua ke lawm, mas nws zoo li ib pab tug rog sawv ua tsheej phiaj npaj ntaus rog. Tus hais txoj Saw Mab Liab yuav paub thiab yuav nco tias nws ua tau ntau tshaj qhov ntawd. Tus twg los cuag kuv, mas nws yuav tau txais kev yeej thiab txoj sia. Vim nws yuav nco tias nws nyob hauv txoj Saw Mab Liab mus li. Tus hais txoj Saw Mab Liab yuav nquag hais thiab muaj lub siab kub lug hais kom zoo. Ces kuv txoj kev hlub yuav ntws los rau saum ntej txhua leej txhua tus.
(6) Riam phom ntawm kev tiv thaiv.
Niam Mab Liab hais tias ; kuv nyob hauv tus neeg tshaj txog kuv qhov tseeb. Nej yuav nrhiav tus cawm nej txoj hau kev thiab nquag hais Saw Mab Liab. Tus nrhiav tau kuv mas yog nws nrhiav tau txoj sia thiab tau txais kev cawm los ntawm Tswv Ntuj. Tus nquag hais Saw Mab Liab, mas yog nws nrhiav kuv thiab nrhiav kuv Leej Tub Yes Xus. Saw Mab Liab yog qhov paj tshab ntawm kuv, yog qhov chaw zoo siab ntawm ib tsoom Tshiab thiab yog qhov tseeb nyob hauv cov Leej Ntshiab. Vim dab phem txoj kev khav theeb swb Saw Mab Liab. Kev hais saw Mab Liab yog ib txoj kev txuas lus nrog Tswv Ntuj yooj yim thiab luv heev nyob ntiaj teb thiab nyob saum Ntuj Ceeb Tsheej. Saw Mab Liab yog paj tshab ntawm cov neeg pluag thiab cov muaj peev xwm. Txog qhov kawg, mas yog kev zoo siab thiab kev nyiam kev hlub. Yog kev cia siab ntawm qhov yuav tau txais paj tshab los pauj rau nws tus kheej thaum nyob ntiaj teb no thiab txoj sia nyob mus li.
(7) Paj tshab ntawm kev khuv leej.
Niam Mab Liab hais tias ; kuv lub siab lees txais thiab tos nej txhua tus. Kev saib txoj Saw Mab Liab muaj nqis thiab hwm, mas yog thawj lub Cim ntawm txoj kev ntseeg nyob hauv kev hais Saw Mab Liab thiab yog kev nyiam uas yus muaj rau Saw Mab Liab. Kuv lub siab yuav muab rau nej nyob hauv txoj Saw Mab Liab, tab sis yuav ua chaw ntxub rau cov neeg ntxub kuv. Txhua zaus kuv yees tawm tuaj rau lub ntiaj teb pom, yog yees tawm los nyob hauv kev hlub thiab kev khuv leej. Kuv ceeb toom nej nyob hauv txoj Saw Mab Liab hais tias ; Saw Mab Liab yog qhov paj tshab ntawm kuv hais txog kev khuv leej neeg.