UA KEV NKAG SIAB TXOG KEV TEEV HAWM

Kev sib tawg yog ib yam uas tshwm sim tau sai kawg nyob rau hauv txhua txheej neeg. Tsis hais tus kheej, tsev neeg, tej pawg neeg, tseem hwv thiab mus txog rau lwm teb chaws. Yog tias kev sib tawg tsis daws kho kom yog, mas yuav rais ua teeb meem loj thiab txog qhov kawg tsuas muaj poob li poob xwb. Qhov uas yuav ua kom sawv daws nyob tau ua ke thiab koom teb koom chaw, mas yuav tsum muaj kev sib hais haum uas yog sawv daws pom zoo tias yuav sib sau nyob ua pab ua pawg tiag. Tab sis muaj tej txhia neeg nyob ua pab ua pawg, kuj yog lawv lam yuam lawv tus kheej nyob xwb, lawv tsis tau txaus siab nyob ua pab ua pawg tiag tiag. Qee pab neeg lam yuam lawv lub siab nyob ua pab ua pawg, vim lawv raug quab yuam. Ces kev sib tawg tuaj yeem tshwm sim tau txhua lub sij hawm. Kev sib tawg uas hais no, yog los ntawm cov teeb meem zoo li no : (1) Roj ntsha (2) Haiv neeg (3) Kev teev hawm (4) Xeem lus (5) Kab lis kev cai (6) Kev coj ntawm haiv neeg. Tab sis nyob rau sob lus no, mas yog hais txog kev sib tawg ntawm kev teev hawm thiab qhia tias yuav ua li cas kev teev hawm thiaj sib haum xeeb tsis sib tawg. Raws li cov neeg ntseeg txoj kev xav, mas qhov tseem ceeb nyob hauv kev teev hawm muaj 3 yam. (1) Tus yam ntxwv ntsia pom tias kev teev hawm, mas tsuas muaj tib txog kev teev hawm xwb thiaj qhia qhov yog thiab yog qhov tseeb. Yog qhov tseeb uas yuav coj neeg mus txog lub hom phiaj uas yog kev cawm, ces ib txhia neeg thiaj hais tias : dhau ntawm lub Koom Txoos lawm, tsis muaj lwm txoj kev cawm. (2) Tus yam ntxwv uas zoo siab lees txais thiab pom txog qhov tseeb ntawm lwm txoj kev teev hawm. Txoj kev ntsia pom no, txawv thawj txoj heev. Cov muaj txoj kev ntsia pom no, lawv paub tias tsuas muaj tib txoj kev teev hawm xwb thiaj muaj kev cawm, tab sis lawv kuj ntsia pom tias lwm txoj kev teev hawm kuj muaj kev cawm tib yam nkaus. Txoj kev cawm no yog ib feem ntawm txhua txoj kev teev hawm, nws tsis yog qhov tseeb tiag tiag. Vim li ntawd, peb yuav ntsia pom tias : ob tug yam ntxwv no sib txawv deb kawg, vim nyias muaj nyias kev xav thiab kev ntsia pom tsis sib luag. (3) Tus yam ntxwv ntsia pom tias txhua txoj kev teev hawm puav leej tseem ceeb, yam li kev teev hawm Phus Thas, kev ntseeg Ntuj thiab kev teev hawm His Ntus, mas muaj vaj huam sib luag thiab sib txig zos. Pom tau tias kev teev hawm nyob hauv ntiaj teb no tsis yog muaj tib txoj xwb, nws muaj ntau ntau txoj. Tab sis txhua txoj kev teev hawm nyias muaj nyias kev qhia neeg thiab daws neeg li teeb meem. Tab sis qhov kawg ntawm txhua txoj kev teev hawm, puas yog tib lub hom phiaj los tsis yog. Txhua txoj kev teev hawm puas yog tib tug Tswv Ntuj los tsis yog, thiab tej zaum txhua tus tswv ntawm cov kev teev hawm ntsej muag kuj tsis zoo ib yam. Kev sib txawv ntawm cov kev teev hawm, mas nws muaj 3 yam sib txawv li no : Yam ib, txhua txoj kev teev hawm nyias muaj nyias kev paub thiab kev xam pom. Qee txoj kev teev hawm yog tib neeg, qee txoj kev teev hawm yog nroj tsuag thiab xyoob ntoo. Yam ob, txhua txoj kev teev hawm kev coj sib txawv, kev qhia sib txawv los ntawm tej keeb kwm. Yam peb, txhua txoj kev teev hawm nyias muaj nyias txoj cai kav nyias cov neeg ntseeg thiab kom ua raws. Tej kab ke txi Ntuj kuj sib txawv thiab. Vim txhua txoj kev teev hawm sib txawv, mas tej txoj kev teev hawm kuj tseeb thiab tsis tseeb, haum rau cov neeg txheej tshiab nyem no thiab tsis haum. Peb yuav tsum nco tias peb tsis muaj peev xwm yuav ua kom txhua tus neeg koom tib txog kab lis kev cai thiab koom tib txoj kev teev hawm. Vim li no, peb yuav tsum lees txais tias cov kev teev hawm muaj ntau txoj thiab kab ke tsis sib thooj. Lub rooj ncauj lus Vas Tis Kas 2 thiaj hais tias : lub Koom Txoos yuav mus ua ke nrog cov neeg txheej tshiab nyem no, yam li yuav ntsib kev nyuaj kev ntxhov, ntsib kev zoo siab hom khaj, ntsib kev cia thiab ntsib kev tag kev cia siab. Kev ntseeg yog txoj cai thiab kev twj lij ntawm leej tib neeg. Cov neeg ntseeg thiaj ntseeg tau tias : txoj kev ntseeg uas yus txais ntawm Tswv Ntuj los, yuav muab pub rau leej twg tsis tau. Lub Koom Txoos kuj ntseeg tias txhua txoj kev teev hawm nws tsis zoo ib yam, vim kev coj thiab kab ke sib txawv. Qhov ntawd nws yog qhov tseeb ntawm txhua txoj kev teev hawm lub ntsiab.

Tus txhais : Lis Maib, Zoo Tswv Zov Yaj