VIM LI CAS PEB THIAJ DAWS TXHAUM?

Kev daws txhaum yog ib lub Cim sab nraud, uas qhia tias yus txawj tu siab rau yus cov txhaum uas nyob hauv yus siab. Kev daws txhaum, mas yus yuav pom tias cov neeg ntseeg thiab tus Txiv Plig tab tom nyob ntawm yus cov txhaum. Kev daws txhaum yog kev yuam yus lub siab kom hais qhov txhaum tseeb thiab lees yus cov txhaum nyob ntawm ib zeej tsoom xub ntiag. Vim li ntawd, tsim nyog peb yuav nquag daws txhaum, muab peb cov txhaum qhov tseeb los hais tawm thiab yuav nco ntsoov Tswv Ntuj txoj kev hlub nyob rau peb nruab siab. 
Lub Koom Txoos kom peb daws cov txhaum hnyav, suav peb cov txhaum seb muaj pes tsawg zaus thiab yam peb ua txhaum ntawd yog dab tsi. Yam tsawg tsawg 1 xyoos 1 zaug. Lub Cim Daws Txhaum, yog txoj kev rau cov neeg ntseeg tau nco txog lawv cov txhaum thiab rov nrog Tswv Ntuj thiab lub Koom Txoos sib haum xeeb. Nyob hauv lub Cim Ntshiab no, Tswv Ntuj tau hais rau peb tias : “Kuv zam koj cov txhaum lawm, thov kom koj mus nyob kaj lug.” 
Lub Koom Txoos tsis tau hais txog cov txhaum sib txhaum me, tab sis peb yuav ua lub Cim Daws Txhaum hais txog tej yam txhaum me peb tau ua thiab. Vim thaum peb daws txhaum, mas peb rov nco txog peb cov txhaum thiab peb txawj xav txog peb tus kheej ntau dua. Lub Cim Daws Txhaum pab kom peb nrog Tswv Ntuj sib haum xeeb thiab nyob ze Leej Ntuj Plig Ntshiab tus coj peb mus rau txoj kev ntshiab huv. Yog peb nquag vam txog lub Cim Daws Txhaum, mas lub Cim Daws Txhaum yuav pab peb kom peb txawj nrug deb ntawm kev ua txhaum thiab ntxuav peb cov txhaum pov tseg tau. Peb yuav mloog tus Txiv Plig uas peb mus daws txhaum cov lus qhia, kom peb txawj coj mus pab peb lub neej. Vim li ntawd, peb cov neeg ntseeg thiaj yuav tsum daws txhaum.