vim li cas thiaj muaj hmoov tsuj xeeb yes xus yug los?

Raws li Lus Kas ntawv Moo Zoo zaj 2 qib 1 txog qib 3, hais tias Huab Tais Yes Xus yug los rau lub caij Xes Ntxas As Nkus ua vaj. Ces thiaj muaj kev txheeb mej hwm nyob thoob lub teb chaws. Nyob hauv ntawv Moo Zoo tsis tau hais meej tias Yes Xus yug hnub twg thiab lub hlis twg. Tab sis cov neeg ntseeg thaum ub xav tias muab hnub tim 25 lub 12 hlis los ua hmoov tsuj xeeb Yes Xus yug los, raws li daim ntawv yug uas cov nom sau khaws tseg. Tab sis qhov tseeb tiag tej ntaub ntawv yug ntawd twb ploj tag lawm, thiab tsis muaj ib tug kws txuj twg yuav tshawb fawb tau. 
Cov kws txuj tshawb fawb txhua yam xav tias : vim li cas thiaj muab hnub tim 25 lub 12 hlis los ua hnub tsuj xeeb Yes Xus yug los txij tiam 4 los lawm. Cov kws txuj muaj ntau lo lus hais, tab sis muaj ib lo lus tseem ceeb li no : yam li xyoo 274 uas yog AURELIAN ua vaj, mas tau muab hnub tim 25 lub 12 hlis los ua hnub hwm lub hnub. Vim hnub ntawd, lub hnub nyob nrug deb tshaj ntawm lub ntiaj teb thiab pib tig ncig mus rau sab pej fab saum qaum huab. Hos hnub tshiab, mas ntev dua txhia hnub. Cov Los Mas thiaj ua hmoov tsuj xeeb hwm lub hnub thiab lawv xav tias lawv tsuj xeeb lawv tus vaj, lawv saib lawv tus vaj zoo li lub hnub ci pom kev rau tsoom pej xeem. Ua rau cov neeg ntseeg nyob rau lub zim txwv ntawd ntxhov siab, vim lawv yuav tsum ua hmoov tsuj xeeb lub hnub raws cov Los Mas kev cai. Cov neeg ntseeg thiaj hloov los tsuj xeeb Yes Xus yug los rau hnub tim 25 lub 12 hlis xyoo 330, hloov cov kab ke tsuj xeeb lub hnub. Txij ntawd los thiaj pib muaj hmoov tsuj xeeb Yes Xus yug los thiab tab meeg tshaj rau sawv daws paub. Yav ua ntej ntawd, muaj kev iab hiam cov neeg ntseeg heev kawg, txij xyoo 64 mus txog xyoo 313. Ua rau cov neeg ntseeg tsis tau kev ua dab tsi thiab tsis muaj hmoov tsuj xeeb Yes Xus yug los. Ib yam ntxiv, cov neeg ntseeg pom tias : nyob hauv Mas Las Kias phau ntawv zaj 4 qib 2, cov His Xas Lais hu Tswv Ntuj ua lub hnub ntawm kev ncaj ncees. Vim li ntawd, thiaj muaj pov thawj nyob hauv Ntawv Ntshiab kom muab hnub tim 25 lub 12 hlis los ua hnub tsuj xeeb Yes Xus yug los.