Hnub cov neeg mob nkees thoob qab ntuj : Nroog Kas Kas Tas, hauv kev txhawb txoj kev ntseeg thiab khuv leej.

Kas Kas Tas yog lub nroog nyob Is Ntias sab hnub tuaj, muaj kev raug zoo txog Leej Ntshiab Tes Les Xas (St. Teresa of Calcutta), tus leej phauj haiv neeg As Npas Nias (Albanian) uas tuaj nyob nroog Kas Kas Tas rau lub xyoo 1929. Nws tau tsa lub Koom Haum tshaj Ntuj Lus thiab pab cov neeg pluag, cov neeg raug tso pov tseg rau lub xyoo 1950.
Ob hnub ua ntej, mas yuav yog kev txhawb txoj kev ntseeg thiab ntsib cov neeg mob nkees thiab tsis muaj zog nyob hauv lub nroog Kas Kas Tas. Hnub tim 11 lub 2 hlis mam xaus lus rau hauv lub koob tsheej.
Hnub tim 9 lub 2 hlis uas yog thawj hnub ntawd, yuav hais txog kev txhawb txoj kev ntseeg  nyob rau hauv lub tsev kawm ntawv qib siab Leej Ntshiab Xas Vias rau cov neeg tuaj txhua txhia qhov chaw txog li 150 leej.
Tas nrho 3 hnub no, yuav muaj thaj txi Ntuj nyob rau ntawm Leej Ntshiab Tes Les Xas lub qhov ntxa rau hnub xya hauv lub lis piam, thiab ua thaj txi Ntuj rau cov neeg mob rau Hnub Chiv, nyob hauv lub tsev kawm ntawv qib siab hwm Leej Ntshiab Xas Vias no. Hos hnub tim 11, mas yuav ua thaj txi Ntuj rau cov neeg mob rau ntawm lub tsev teev Ntuj Npas Des, nyob deb ntawm nroog Kas Kas Tas mus sab qaum teb li 55 kis los mev.
Hnub Chiv thaum sawv ntxov, sawv daws yuav raug faib ua 3 pab, ib pab 100 leej, lawv yuav mus tsham 3 lub tsev saib xyuas cov neeg mob hauv nroog Kas Kas Tas, yog lub tsev Xas Tis Das (Shanti Dan), Pes Das (Prem Dan) thiab Leej Ntshiab Yos Xes lub tsev (St. Joseph’ s Home).
Tom qab ntawd, lawv mam los sib ntsib nyob rau hauv lub tsev kawm ntawv qib siab hwm Leej Ntshiab Xas Vias.
Dhau yav tav su, mam ua thaj txi Ntuj thiab ua lub Cim Txhab Zog rau cov neeg muaj mob, kwv yees muaj neeg tuaj koom ze li 2,000 leej thiab cov mob 150- 200 leej.
Cov neeg tuaj koom hnub cov neeg mob thoob ntuj no, muaj cov sawv cev ntawm Vas Tis Kas 6-8 leej uas muaj yawg Pob Zeb Tus Xas (Peter Turkson) tus Thawj Pwm Tsav ntawm Koom Haum txhawb nqa tib neeg, dhau ntawd muaj cov Leej Choj hauv As Xias qab teb sab hnub tuaj thiab cov Leej Choj hauv Is Ntias teb.
Hnub tim 11 uas tsa lub koob tsheej, mas cov neeg mob nkees thoob ntuj rau ntawm lub tsev Mas Lees hauv lub tsev teev Ntuj Npas Des, sab qaum teb ntawm nroog Kas Kas Tas. Muaj Tswv Qhia Pas Tis Dis Los Xas Lis Os (Patrick D’Rozario) ua tus sawv Vaj Qhia chaw coj sawv daws ua thaj txi Ntuj thiab ua lub Cim Txhab Zog rau cov neeg mob.
Hnub cov neeg mob nkees no, yog Leej Ntshiab Zam Paj Lug 2 ua tus tsa nyob rau hnub tim 13 lub 5 hlis xyoo 1992, kom yog muab ua rau hnub tshwj xeeb leej niam hauv nroog Luj, yog hnub tim 11 lub 2 hlis ntuj txhua txhua xyoo. Kom sawv daws khuv leej txog cov neeg mob nkeeg thiab cov saib xyuas.  
Hnub cov mob nkees thoob ntuj thawj zaug yog tsa nyob rau xyoo 1993, nyob rau lub nroog Luj, Fab Kis qab teb. Hos zaum no yog zaum ob uas tsa nyob hauv teb chaws Is Ntias, zaum ib yog nyob rau lub nroog Vas Lees Tas Nis, Is Ntias qab teb rau lub xyoo 2003.