Vaj Qhia lees rau tsoom sid tias : lub Koom Txoos Kav Tos Liv muaj teeb meem cov Leej Choj deev cov Leej Phauj tiag.

Hnub tim 5 lub 2 hlis ntuj xyoo 2019 no, Vaj Qhias Fas Ntsis Kus lees tias Koom Txoom Kav Tos Liv muaj teeb meem cov Leej Choj deev cov Leej Phauj tiag. Ua ntej ob peb xyoos tas los no, ib co Leej Phauj nyob rau ntau lub teb chaws tau sawv los hais tias : lawv raug cov Leej Choj quab yuam ua dev ua npua. Tsis tas li xwb, lub lis piam tag los tsab xov xwm Vas Tis Kas tau sau txog cov Leej Phauj noj tshuaj ntaus cev, los yog cov me nyuam uas xeeb los ntawm cov Leej Choj, tab sis Vaj Qhia tsis hais tej teeb meem no rau tsoom sid paub.
Txog rau hnub uas Vaj Qhia mus tsham As Las Npias teb rov los txog, muaj ib tug tub xov xwm thiaj nug txog nqe no. Vaj Qhias teb tias : “Qhov ko muaj tseeb.”
Ob peb xyoos tas los ntawd, muaj ib lub Koom Haum #MeToo tau quaj hu kom Vaj Qhia lees txog qhov teeb meem no. Tsis tas li xwb, lub 11 hlis xyoo 2018 tag los, tseem muaj ib pab poj niam Kav Tos Liv uas siv lub npe International Union of Superior General (UISG) tau hais rau cov tub sau ntawv xov xwm txog “Kev cai ntsiag thiab kev npog” yog qhov ua rau muaj kev zes cov Leej Phauj, thiab lawv txhawb kom cov Leej Phauj hais tawm tej teeb meem no rau tej nom tswv.
Lub 1 hlis tag los no, Aws Maas Kais Laws thawj pwm Leej Choj fab kev tshaj Ntuj Lus hauv Vas Tis Kas tau tawm ntawm nws lub luag hauj lwm, vim muaj lus hais tias : nws yog ib tug muab cov Leej Phauj ua dev ua npua. Lus Xes Tas Xas Kas Las Fias tau sau rau hauv phau ntawv xov xwm poj niam tias, teeb meem ntawm cov Leej Choj deev cov Leej Phauj, vim yog cov Leej Choj muaj hwj chim loj dhau. Kev deev cov Leej Phauj no ua rau lawv txaj muag, ces lawv thiaj noj tshuaj ntaus me nyuam pov tseg.
Vaj Qhia tau teb cov tub sau ntawv xov xwm tias, ziag no cov Leej Choj hauv Vas Tis Kas tab tom nrhiav kev daws cov teeb meem no. Pom tau tias tus Vaj Qhia dhau los twb tau muab cov Leej Choj ua txhaum txo ntawm kev ua Leej Choj ntau tug.
Kev deev thiab quab yuam cov Leej Phauj ua dev ua npua no, twb muaj los tau 20-30 xyoo lawm, yam li nyob rau As Mes Lis Kas teb, los xws li As Fis Kas teb thiab lub xyoo tas los ntawd, muaj ib tus Leej Phauj Is Ntias tau lees tias nws raug ib tug Leej Choj deev thaum xyoo 2014-2017, tus Leej Choj no raug tub ceev xwm ntes, tab sis tseem muaj cov neeg hwm nws heev. Los yog cov Leej Phauj hauv Sis Lis teb, lawv sau tej no mus rau cov Leej Choj txheej siab, ua rau lawv raug ntiab tawm hauv lub Koom Txoos, tsis yog cov Leej Choj uas ua txhaum raug ntiab.
Nyob rau lub xyoo tag los ntawd, xov xwm txawv teb chaws tau hais tias : Vas Tis Kas rau txim rau cov Leej Choj ua txhaum no tsis hnyav txaus, thiab tsis txhawb cov Leej Phauj uas raug deev no txaus.
Tsis tas li xwb, Mab Liab Ntis Phes Xas, tus qub Leej Phauj ntawm pab pawg neeg raug Leej Choj deev (Survivors Network of Those Abused by Priests) tau sau rau hauv Twitter tias : thaum nws tau hnov cov Leej Phauj piav txog tej no, mas nws npau taws rau Vaj Qhia heev, uas tsis tawm los tiv thaiv cov Leej Phauj thiab daws cov teeb meem no.