Vaj Qhia thiab 114 tug Tswv Qhia Liab sib sau sab laj nyob Vas Tis Kis.

Yog thawj zaug uas cov Tswv Qhia Liab nyob thoob ntiaj teb mus sib sau ua ke nrhiav kev daws cov teeb meem kub ntxhov hauv lub Koom Txoos. Vim tias lub Koom Txoos muaj cov teeb meem no tshwm sim kub ntxhov los tau ntau xyoo lawm. Hais txog cov teeb meem cov Txiv Plig quab yuam cov me nyuam yaus deev no, tsaib no twb muaj nyob hauv ntau lub teb chaws xws li : As Mes Lis Kas teb, Sis Lis teb thiab Zes Mas Nias teb. Vaj Qhia tau hais tias : “Tas ntiaj teb thuam thiab ntsia ntsoov seb lub Koom Txoos yuav daws cov teeb meem no li cas ? Puas yuav tshwm ib txoj cai twg uas yog txoj cai ncaj ncees ?” Kev sib sau laj zaum no, muaj 114 tug Tswv Qhia sib koom ua ke. Vaj Qhia tau hais ntau lo lus qhuab qhia cov Tswv Qhia Liab, ces vam tias thaum lawv rov mus lawv teb chaws, mas cov Tswv Qhia Liab yuav muab siab rau soj ntsuam txog cov teeb meem no, kom txhob muaj tshwm sim ntxiv lawm. 
Txawm li cas kuj xij, tseem muaj ntau lub teb chaws nyob As Xias teb thiab nyob As Fis Kas teb tsis kam lees tias muaj cov teeb meem zoo li no tshwm sim. Ib tug Tswv Qhia Liab uas nws yog neeg As Mes Lis Kas, nws yog 1 tug nyob hauv 4 leeg koom tsa lub rooj sab laj zaum no, nws yog Vaj Qhia ib tug txheeb phooj ywg thiab yog tus Vaj Qhia tso siab nyob As Mes Lis Kas teb hais tias : “Vam tias sawv daws yuav pom lub rooj sab laj zaum no muaj tej yam txawv txav, thiab yuav sib pab daws cov teeb meem no kom ploj mus.” Lub Koom Txoos Kav Tos Liv nyob As Mes Lis Kas teb nyuam qhuav raug cov teeb meem no, thiab yog ib zaug kub ntxhov tshaj plaws. Yam li tus Tswv Qhia Liab This Os Dos tau deev ib tug tub hluas 50 xyoo dhau los, ces Vaj Qhia nyuam qhuav ntiab tus Tswv Qhia Liab ntawd tawm lub lis piam tag los no lawm. Cov xwm no ncha teb chaws kawg nkaus. Tus Tswv Qhia Liab neeg As Mes Lis Kas ntawd hais ntxiv tias : nyob hauv lub rooj sab laj zaum no, mas muaj 3 yam loj. Xws li kev saib xyuas, kev lees txais tias txhaum thiab tsis txhaum, kev ncaj ncees dawb huv.