COV NEEG NTSEEG NYOB THAIB TEB PAB COV TXOM NYEM

Lub sij hawm uas tus kab mob Covid-19 sib kis nyob thoob ntiaj teb, mas tsoom pej xeem Thaib tau txais kev kub ntxhov loj kawg. Tab sis muaj cov neeg ntseeg nyob Thaib teb koom tes pab tsoom pej xeem ntau kawg. Ntau lub hlis dhau los no, cov neeg ntseeg nyob Thaib teb tau pab cov neeg txom nyeem ntau yam. Kev lag luam muaj teeb meem, mas ua rau tsoom pej xeem Thaib ntau plhom leej poob nyob hauv txoj kev txom nyem. Nyob qaum teb hauv lub xeev Chiangmai uas nyob Thaib teb, mas muaj cov neeg ntseeg coob kawg. Cov Kav Tos Liv thiab cov Plos Tes Taas tau faib txhiam xws noj thiab faib toob xib rau cov nroog uas muaj neeg txom nyem nyob coob. Qee tus neeg ntseeg kuj tau qhia tej xwm ntawd rau cov hauj sam, hais txog cov neeg ntseeg tau pab tsoom pej xeem uas txom nyem.
Cov neeg ntseeg nyob Thaib teb pib txais kev ntseeg los ntawm ib tug tub tshaj Ntuj Lus Pos Tws Nkas nyob hauv tiam 16. Tab sis kev ntseeg tsis tshua loj hlob nyob hauv cov neeg Thaib, vim cov neeg Thaib feem coob yog teev hawm Phus Thas. Xam huv si cov Kav Tos Liv thiab cov Plos Tes Taas, mas tsuas yog 1 feem pua ntawm tsoom pej xeem Thaib 69 plhom leej. Tab sis cov neeg ntseeg coob dua cov Mawv Xis Lim 4 feem pua ntawm tsoom pej xeem Thaib. Yog haiv neeg tsawg uas muaj cov neeg teev hawm Mawv Xis Lim coob tshaj nyob Thaib qab teb. Tam sim no muaj cov tsev teev Ntuj nyob Bangkok thiab yuav luag txhua lub xeev txhua lub nroog. Cov neeg ntseeg feem coob yog cov neeg toj siab uas nyob deb kev vam meej hauv lub xeev Chiangmai. Cov neeg Thaib lawv tsis tshuav txais kev ntseeg, yog vim lawv ib txwm teev hawm Phus Thas. Ib feem tsawg yog cov uas lawv ua txhaum rau kev teev hawm Phus Thas ces lawv thiaj los txais kev ntseeg xwb. Cov neeg Thaib uas lawv los txais kev ntseeg, mas lawv kuj raug cov teev hawm Phus Thas thuam tias lawv tso Thaib tej kab lis kev cai pov tseg. Lawv kuj raug thuam tias lawv mus teev cov neeg txawv teb chaws tej kev cai thiab hawm tej yam uas tsis yog Thaib li. Muaj ib txhia neeg tsis yog cov neeg ntseeg, tsis kav lawv kuj txawj ua zoo thiab hlub luag tej.