NTHUAV NTAWV MOO ZOO HNUB TIM 3/11/2019

MT 5 : 1-12

Txoj Hmoov zoo.

1 Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.

Kwv tij sawv daws, thaum peb muab ntsia txog qhov tseeb, peb yuav xam pom tias ; kev uas peb yuav nce mus rau ib qho chaw siab siab, yam li peb nce mus rau tej lub roob siab siab, yeej tsis yog yooj yim kiag, vim peb yuav tsum siv zog, peb yuav txog siav, thiab qaug zog. Peb tsaug ceg, muaj qee zaus peb kuj ntog thiab, mas yeej ua rau peb sab kawg nkaus, peb thiaj yuav nce mus nto saum lub ncov roob. 

Nyob rau hauv peb kev ua neej los yeej zoo ib yam li ntawd, hnub no peb hwm txog tsoom Leej Ntshiab, yog peb pom txog Huab Tais Yes Xus thiab tsoom Leej Ntshiab lub neej, peb paub tias, lawv yeej hla kev txom nyem thiab raug xwm txheej ntau yam. Peb yuav ntsib qhov pom kev thiab kev kaj siab, kev zoo siab, uas Huab Tais Tswv Ntuj pub rau peb, zoo yam li zaj lus hnub no.

Zaj lus hnub no uas hais txog cov tau txoj hmoov zoo yog cov zoo li cas ? 

Peb cov ntseeg sawv daws yeej tau hnov hnov dua los lawm, vim yog ib zaj lus uas Huab Tais Yes Xus nplij peb siab zoo tshaj plaws thiab kuj yog peb txoj kev tso siab rau Ntuj. 

Qhov tseeb tiag, kev ua Huab Tais Yes Xus thwj tim, yog peb yuav tsum niaj hnub kho peb tus kheej kom peb ua tau ib tug neeg ntshiab neeg huv, thiab zoo tshaj plaws. Xws li peb tus Huab Tais Leej Txiv nyob saum Ntuj, uas nws yog tus ntshiab huv thiab zoo tas nrho.

Huab Tais Yes Xus hais tias : “Cov tau txoj hmoov zoo yog cov pluag hauv nruab siab.”

Cov pluag hauv nruab siab, thiab cov pluag saum cev nqaij daim tawv sib txawv li cas ?. 

Qhov txawv ntawd yog txawv qhov twg ?

Qhov txawv yog qhov tias ; cov pluag saum lub cev nqaij daim tawv, yog cov neeg txom nyem, uas lawv tsuas ntshaw kom muaj tus pub mov pub nqaij rau lawv noj lawv haus, thiab pub khaub ncaws rau lawv hnav xwb. Tiam sis, tus pluag hauv nruab siab, yog tus uas ntshaw txog Huab Tais Tswv Ntuj txoj kev cawm. Yog tus uas xav hnov thiab xav mloog Tswv Ntuj lo lus, yog tus uas xav tau Tswv Ntuj lub Ceeb Tsheej los ua nws tug. 

8 nqe lus uas hais txog cov tau txoj hmoov zoo no, yog qhov uas peb cov ntseeg sawv daws yuav tsum muaj nyob nraim hauv peb nruab siab. Vim yog peb txoj kev tso siab rau Huab Tais Tswv Ntuj. Peb los raws Huab Tais Yes Xus, kuj yog vim peb ntshaw txog Tswv Ntuj lub Ceeb Tsheej, peb ntshaw txog Huab Tais Tswv Ntuj txoj kev hlub, peb xav tau txoj sia nyob mus li los ua peb tug, vim peb yog cov pluag hauv nruab siab.

Tab sis, Huab Tais Yes Xus tsis tau qhia kom peb yuav tsum tos ntsoov Tswv Ntuj pab peb xwb, Huab Tais Yes Xus qhia kom peb nyiam Tswv Ntuj thiab hlub luag tej, peb yuav tsum txawj sib hlub sib pab. “Cov tau txoj hmoov zoo yog cov txawj hlub luag tej. Cov tau txoj Hmoov zoo yog cov siab ncaj, thiab yog cov tsim kev thaj yeeb. Thaum peb tau txais Tswv Ntuj lub txiaj ntsim lawm, peb yuav mus pab luag tej, peb yuav tsum ua qhov zoo. Huab Tais Yes Xus qhia meej rau peb hais tias ; “Yog nej tau ua zoo rau ib tug neeg twg, qhov ntawd yog nej ua rau kuv.”

Li ntawd, tus pluag hauv nruab siab yog tus ua raws li Tswv Ntuj lub siab nyiam, nws ua qhov xis Tswv Ntuj siab, nws tsis ua ywj nws siab. Ces nws coj Tswv Ntuj txoj kev hlub mus pub rau luag lwm tus.

Kwv tij sawv daws, peb yuav tau txais Tswv Ntuj lub txiaj ntsim nyob rau hauv Tswv Ntuj cov hauj lwm. Peb yuav pom tias, cov uas tau txais Tswv Ntuj lub txiaj ntsim thiab tau lub neej nyob kaj siab yog cov mloog Tswv Ntuj lus, thiab ua xis Tswv Ntuj siab.