IB TUG TXIV PLIG NIS ZES LIAS RAUG NTES

Hnub tm 26 lub 9 hlis no, muaj ib tug Txiv Plig Kav Tos Liv nyob hauv lub xeev Des Taj nyob Nis Zes Lias teb raug tub sab ntes. Tus Txiv Plig no nws raug ntes 2 zaug lawm,  thawj zaug yog nyob hauv xyoo 2018. Tus Txiv Plig uas raug ntes, hu ua Jude Onyebadi, nyob hauv lub tsev teev Ntuj hwm Leej Ntshiab Pob Zeb thiab Paj Lug. Tab sis nws kuj raug tub sab tso rov qab los lawm, tsis paub tias nws puas raug txhiv nqi taub hau li cas los tsis raug. Nis Zes Lias yog lub teb chaws uas muaj tsoom pej xeem coob tshaj cov teb chaws nyob xeev ntuj As Fiv Kas. Yog lub teb chaws uas muaj cov ntseeg thiab cov Mawv Xis Lim coob. Muaj qee thaj tsam, mas cov Mawv Xis Lis yog cov muaj zog thiab muaj hwj chim dua.
Cov teeb meem yog li no, Txig Plig Onyebadi nws muaj hnub nyoog 54 xyoos. Nws mus saib nws cov tub zog thiab them nyiaj hli rau lawv, tab sis muaj ib tug tub sab raws nws qab. Tus tub sab muaj phom thiab nws ntes Txiv Plig nrog rau 3 tug tub zog mus, tab sis thaum yuav tsaus ntuj mas kuj muab lawv tso tas los lawm. Lub Cheeb Koom Txoos Issele-Uku yog nyob hauv lub xeev Des Taj thiab muaj cov neeg ntseeg coob kawg. Nyob hauv lub xeev kuj muaj cov Mawv Xis Lim uas nyiag tsim kev kub ntxhov tej pawg me me nyob ua sab ua sua thiab nkaum nyob hauv tej hav zoov. Lawv yog cov Mawv Xis Lim uas nyiam yug tsiaj thiab nyob tsis ruaj chaw. Kev ntes neeg nyob Nis Zes Lias teb, mas muaj ua ntu zus. Txij xyoo 2018 los, nyob hauv lub Cheeb Koom Txoos Issele-Uku twb muaj cov Txiv Plig raug ntes li ntawm 6 leej lawm. Txiv Plig Onyebadi yog tus Txiv Plig tim 6 uas raug ntes.