NTHUAV NTAWV MOO ZOO HNUB TIM 5/11/2019

LK 14 : 15-24

Zaj paj lug hais txog cov neeg luag caw tsis kam tuaj.

15 Yes Xus hais cov lus no, ces cov neeg tuaj noj mov ntawd muaj ib tug hais rau Yes Xus tias : "Tus uas yuav tau noj mov nyob hauv Tswv Ntuj lub Ceeb Tsheej, mas nws txoj hmoov zoo." 16 Yes Xus hais rau nws tias : "Muaj ib tug neeg ua ib roog qav loj, nws caw neeg coob coob. 17 Thaum txog caij noj, nws xa nws tus tub txib mus nqua hu cov neeg nws caw tias : 'Nej tuaj, vim nyem no npaj tau txhij tas lawm.' 18 Tab sis cov raug caw, tus twg los muaj chaw tab kaum tas huv si. Thawj tug hais rau tus tub txib tias : 'Kuv yuav tau ib daim teb, kuv yuav tsum mus xyuas. Thov koj zam rau kuv.' 19 Hos muaj ib tug hais tias : 'Kuv yuav tau tsib nkawg txiv nyuj, kuv yuav mus sim kuv cov nyuj. Thov koj zam rau kuv.' 20 Lwm tus hais tias : 'Kuv nyuam qhuav yuav poj niam, kuv tuaj tsis tau.' 21 Tus tub txib rov los qhia tej ntawd rau nws tus tswv. Ces tus tswv tsev npau taws, nws hais rau tus tub txib tias : 'Koj maj zeeg mus tom cov tshav puam thiab cov kev hauv nroog, koj coj cov pluag, cov tu tes tu taw, cov dig muag, thiab cov ceg tawv, sawv daws tuaj hauv no.' 22 Ces tus tub txib hais tias : 'Huab tais, kuv twb ua raws li koj hais lawm, tsis kav tseem tshuav chaw seem thiab.' 23 Tus tswv hais rau tus tub txib tias : 'Koj tawm mus taug tej kev, taug tej laj kab, koj coj kom tau neeg tuaj, kom kuv lub tsev puv nkaus.' 24 Ua li mas kuv hais rau nej tias cov neeg uas raug caw, yuav tsis muaj ib tug saj kuv rooj qav."

Huab Tais Yes Xus ua paj lug qhia peb tias ; Tswv Ntuj lub Ceeb Tsheej zoo yam li ib rooj qav uas noj haus tsis txawj tag, Tswv Ntuj tau npaj ib rooj qav loj thiab zoo tshaj plaws tos peb sawv daws, nws xav caw peb sawv daws los koom nrog nws, tab sis, tseem muaj ib txhia neeg tsis kav los.

Kwv tij sawv daws, Tswv Ntuj pub txiaj ntsim rau peb ntau tsav ntau yam dawb dawb, Tswv Ntuj hu peb los ua Tswv Ntuj cov me nyuam, Tswv tsis taij tsis thov dab tsi ntawm peb, Tswv Ntuj tsuas xav kom peb txawj coj lub neej ua ib tug neeg zoo, ua neeg ntshiab neeg huv, ces thaum txog hnub kawg, Tswv Ntuj yuav txais peb mus nrog Tswv Ntuj hauv nws lub Ceeb Tsheej, uas yog lub teb chaws ntshiab huv, yog lub teb chaws uas yuav tsis muaj kev txom nyem, tsis muaj kev iab kev daw, kev lwj siab lwj plawv ntxiv lawm, tsuas muaj kev kaj siab lug mus li lawm xwb.

Thov kom peb npaj peb lub siab, thiab peb tu peb tus ntsuj plig kom ntshiab kom huv txhua txhia hnub, nyob rau hauv peb txoj kev ntseeg txog Huab Tais Yes Xus, ces thaum txog hnub kawg, peb yeej yuav tau nrog Huab Tais Tswv Ntuj lub Ceeb Tsheej mus li.