HNUB RHUAV TSHEM KEV UA PHEM RAU COV POJ NIAM (International Day for the Elimination of Violence against Women)

Txhua txhua xyoo hnub tim 25 lub 11 hlis, yog hnub rhuav tshem kev ua phem rau cov poj niam nyob ntiaj teb no. Li ntawd, tsim nyog peb yuav rhuav tshem kev ua phem rau cov poj niam thiab cov me nyuam ntxhais, vim yog ib yam uas hla tib neeg kev ncaj ncees nyob ntiaj teb no. Kev ua phem rau cov poj niam kuj yog ib yam teeb meem loj nyob rau lub zim txwv no thiab. Muaj ib txhia poj niam raug quab yuam mos deev, tab sis lawv tsis muaj cuab kav hais tawm thiab kom tub ceev xwm, vim lawv ntshai tsam lawv txaj muag.       

(1) Kev ua phem rau cov poj niam los yog txij nkawm, mas yog kev ntaus thiab tsim txom siab ntsws. Muaj tej nkawm niam txiv sib ceg sib ntaus, ces sib tua tuag.

 (2) Kev ua phem rau cov poj niam uas yog los ntawm kev mos deev, mas yog kev quab yuam mos deev cov ntxhais hluas. Kev quab yuam tej ntxhais yuav txiv thiab muab tej ntxhais mos deev tom tej ntug kev, los sis lwm yam uas peb pom tshwm nyob hauv Internet. Txhua yam uas hais los no, puav leej yog kev ua phem rau cov poj niam thiab cov ntxhais hluas nkauj.

(3) Kev ua luam muag neeg, mas yog ntxias tej ntxhais hluas coj mus muag ua niam ntiav.

(4) Kev txiav poj niam thiab txiv neej li khoom los sis chaw mos.

(5) Kev yuam tej ntxhais sib yuav thaum tseem yau.

Kev tsim txom poj niam siab ntsws, mas yog ib txog kev ceeb laj nyiaj kawg nyob hauv cov poj niam lub neej. Piv li cov ntxhais hluas raug mos deev, yuav ua rau lawv plam lawv txoj kev kawm thaum yau tsis txaus. Tsis tas li ntawd, lawv tseem raug neeg thuam raug txwv nyob hauv cov tsev kawm ntawv txheej siab, thiab raug txwv nyob hauv kev ua hauj lwm nyob hauv tej kiab khw. Kev ua phem rau cov poj niam, yog teeb meem ntawm kev muaj vaj huam sib luag, kev nyob ywj pheej thiab kev ncaj ncees ntawm tib neeg hais txog cov poj niam thiab cov me nyuam ntxhais.

          Kev sib koom tes rhuav tshem los yog tso tseg kev ua phem rau cov poj niam, tsis hais nyob thoob ntiaj teb los sis nyob hauv ib lub teb chaws twg kuj xij, ua kom peb ntsia pom tias cov neeeg ntawd tsis tau txais lub txim tsim nyog. Nyob hauv hnub rhuav tshem kev ua phem rau cov poj niam hnub tim 25 lub 11 hlis xyoo no thiab 2 xyoos tom ntej, mas lub Koom Haum UNITE txuag cov poj niam thiab lub Leej Haum Kuj yuav hais txog lub ntsiab lus ntawm “kev mos cov poj niam deev, yog kev tsim txom poj niam tsis hais nyob hauv lub caij nyob thaj yeeb los sis ua tsov ua rog.”