TSWV QHIA LIAB HAUV PAS KIS TAAS THOV KEV NCAJ NCEES RAU HAIV NEEG TSAWG

Raws li tus Tswv Qhia Liab Yos Xes Kus (Card. Joseph Coutts) nyob Khas Las Ntsis hais, mas cov tseem hwv txoj hauj lwm yog kev ncaj ncees rau txhua tus neeg uas yog haiv neeg tsawg nyob hauv lub teb chaws. Vim kev nyiag neeg, kev quab yuam kom ib tug neeg twg hloov kev teev hawm thiab quab yuam sib yuav, mas yog kev hla tseem hwv txoj cai, tsis yog ib qho tseem ceeb nyob hauv cov kev teev hawm.

Tswv Qhia Kus hais tias “Peb yog pej xeem Pas Kis Taas thiab txoj cai kuj yog kav tas tsoom pej xeem Pas Kas Taas txhua tus, vim li ntawd tsim nyog cov tseem hwv yuav muab kev ncaj ncees rau lawv cov pej xeem”.

Ib tug me nyuam ntxhais 13 xyoos hu ua As Xus (Arzoo) uas nws raug neeg nyiag mus hnub tim 13 lub 10 hli. Nws raug quab yuam yuav ib tug txiv neej 44 xyoos thiab raug quab yuam hloov kev teev hawm. Chiv thawj cov tub ceev xwm tau txais ib daim ntawv zeem tseeb cuav los ntawm nws tus txiv hais tias tus ntxhais ntawd hnub nyoog muaj 18 xyoo thiab qhov nws hloov kev teev hawm yog nws txaus siab thiab nws nyiam. Cov tub ceev xwm thiaj thim lo lus txiav txim uas lawv tau txiav txim yav tag los, vim lawv tau txais tsab ntawv kom cuav xwb.

Cov tub ceev xwm siv sij hawm 5 hnub nrhiav As Xus thiab muab nws cais mus nyob lwm qhov chaw. Cov kws kho mob hais tawm hnub tim 9 lub 11 hlis no tias tus ntxhais ntawd hnub nyoog muaj 13 xyoos xwb, qhov no yog qhov tseeb raws tseem hwv cov ntaub ntawv kav pej xeem.