COVID-19 UA RAU COV TUB NTXHAIS HLUAS POOB HAUJ LWM

Muaj ib tug xib hwb qhia ntawv hais tias : txij thaum muaj tus kab mob Covid-19 los, nws tsuas tau txais nyiaj hli 2 lub hlis xwb. Dhau ntawd, mas nws tsis tau txais nyiaj hli li lawm. Tsis tas li ntawd, tsev kawm ntawv kuj raug kaw ces nws tsis muaj hauj lwm ua. Nws nrog tsev neeg nyob yam neeg tsis muaj hauj lwm thiab tsis pom qab yuav nrhiav noj li cas. Hos muaj ib tug txiv neej hu ua Kajol Corraya ua hauj lwm nyob hauv ib lub tsev txais qhua, nws hais tias  nws tsis poob hauj lwm, tab sis nws li nyiaj hli raug txo qis dua qub. Ua ntej tus kab mob Covid-19 tsis tau tshwm sim, mas nws tau nyiaj hli ib lub hlis yog 355 US dos las, hos tam sim no nws li nyiaj hli tshuav 177 US dos las lawm xwb, nws cov nyiaj qiv txais hauv txhab nyiaj los nws kuj them tsis taus rov. Hais txog teeb meem tus kab mob Covid-19, tsis yog ua teeb meem rau tsoom pej xeem los yog kev lag luam xwb, nws ua teeb meem rau txhua tsav puas yam nyob hauv lub teb chaws. Ua rau cov tub ntxhais hluas nyuam qhuav kawm ntawv tiav lawv nrhiav tsis tau hauj lwm ua. Ces tsoom tub ntxhais hluas vam tias tus kab mob Covid yuav dua mus sai sai, kom sawv daws rov muaj hauj lwm ua thiab tej nyiaj hli txhob raug txo.

Tseem muaj ib txhia pej xeem khiav tawm hauv lub nroog Thas Kas mus rau lwm qhov, vim lawv nrhiav tsis tau noj lawm. Kev pab cov neeg txom nyem lub zim txwv no, mas cov neeg ntseeg Kav Tos Liv thiab cov Caritas tau npaj txhiam xws noj thiab nyiaj txiag mus rau cov Txiv Plig thiab cov neeg txom nyem, tab sis vim cov neeg pluag txom nyem muaj coob dhau, ces lawv txoj kev pab tsis txaus thiab mus tsis txhua.