40 xyoo ntawm xov tooj cua Radio Veritas Asia nyob Npees Las Des teb

Cov neeg mloog xov tooj cua qhuas txog lub xov tooj cua Radio Vertas Asia (RVA) uas nyob Npees Las Des heev. Vim yog ib lub xov tooj cua tshaj tau lus zoo thiab ua kom tej pab neeg tau paub txog neeg kab lis kev cai. Ces cov zej zog nyob toj siab hauv Npees Las Des teb thiab hauv lub xeev Npees Nkos nyob Is Ntias teb sab hnub poob sau ntawv mus fim coob kawg. Lub xov tooj cua Radio Vertas Asia nyob Npees Las Des teb yog cov Txiv Plig As Xias tsa los txwm 40 xyoo.

Li ntawd lawv thiaj ua lub hnub nyoog nco txog nyob hauv Banideepti (Light of the World) uas yog qhov chaw Multimedia ntawm Christian Communication Center (CCC), kom tau nthuav tawm cov Txiv Plig Kav Tos Liv nyob Npees Las Des teb hauv lub nroog Thas Kas hnub tim 1 lub 12 hlis no. Hnub ua lub hnub nyoog ntawd, mas muaj neeg mus sib koom tsis coob, vim tus kab mob Covid-19. Lawv muaj thaj txi Ntuj ua Tswv Ntuj tsaug thiab tso tawm nyob hauv facebook.

Tus Txiv Plig Augustine Bulbul Rebeiro uas nws yog tus thawj tswj ntawm  CCC, tau muab paj tshab pub rau cov Txiv Plig uas lawv tau muab siab rau tshaj xo, thiab ua tsaug rau cov neeg uas tau mloog lub xov tooj cua los ntau caum xyoo. 40 xyoo dhau los uas lub xov tooj cua RVA Bengali Service tau ua hauj lwm tshaj xo raws li lawv lub hom phiaj rau ib tsoom neeg mloog. Ashik Iqbal uas nws muaj 48 xyoo, nws yog neeg Mawv Xis Lim nyob hauv Rajshahi hais tias : nws zoo siab thiab sov siab uas nws tau ua hauj lwm nrog RVA los ntau xyoo.

Lub xov tooj cua RVA pib tshaj xo thawj zaug nyob hauv xyoo 1969 thiab tshaj tawm ua 22 xeem lus. Xyoo 1980 thiaj mam muaj nyob Npees Las Deb teb. Txij xyoo 2011 los, ntau xeem lus tau thim ntawm RVA thiab cov Cheeb Koom Txoos ntawm txhua lub teb chaws kuj tau pab nyiaj rau RVA tshaj lus. Xyoo 2017, lub tshaj xo RVA tau hloov ua Digital, kom tau pab txuag RVA cov nyiaj ua hauj lwm. Vim niaj xyoo RVA siv nyiaj los tshaj xo li ntawm 1 plhom 600 txhiab US dos las. Dhau ntawm kev tshaj xo nyob RVA Bengali Service lawm, tseem muaj tshaj cov Video thiab. RVA Bengali Service tshaj xo ua lus Bangla uas yog xeem lus nruab nrab nyob Npees Las Des teb thiab xeem lus ntawm lub xeev Npees Nkos nyob Is Ntias sab hnub poob. Cov neeg mloog thiab saib Video ntawm RVA, feem coob yog cov Mawv Xis Lis thiab cov His Ntus.