OB TUG NIAM TXIV SIB NYIAM SIB HLUB

Tswv Ntuj cog kev sib nyiam sib hlub rau hauv tus txiv neej thiab tus poj niam, thiab tus ua niam ua txiv, thiab tus ua me nyuam.

Kev sib nyiam sib hlub, thaum tseem ua nkauj ua nraug yog zoo li cas?  Nkawd kawg saib ntshis lub ntsej muag thiab lub cev rau hauv daim tsom iav, ua kom koj pom kuv los zoo, kuv pom koj los zoo xwb. Nkawd tsis nco qab pom qhov phem, vim nkawd txoj kev sib nyiam sib hlub ntawm nkawd zoo tag tib si. Tsis pom muaj qhov xyeej lawm.

Tas hnub tas hmo, nkawd xav sib pom thiab sib hais lus sib tham xwb. Cov lus nkawd hais yog lus dab tsi? Yog ib cov lus uas tsuas muaj qhov luag nyav ua kom nkawd zoo siab nyiaj dab ntub zias sib tham, tsis tsaug zog li.

Nkawd txuag nkawd kev sib nyiam sib hlub zoo tas nrho.

Nyem no, peb cov uas twb ua niam ua txiv muaj tub ki nroo ntws txog nrab neej li no lawm, peb kuj yuav muab siab rau los nrhiav kev sib hlub kom zoo li thaum ua nkauj ua nraug thiab, vim nyem no peb tag lub neej sib hlub zoo li tus hluas nkauj hluas nraug lawm. Tab sis peb tseem tshuav lub neej sib hlub zoo li niam txiv thiab me nyuam. Vim Ntuj tau muab ntau txoj kev rau neeg taug

Cov lus yus siv los hais rau yus tus poj niam los yus tus txiv; yuav tsum siv cov thaum tseem ua hluas nkauj hluas nraug ib nrab thiab. Hos ib nrab mas yog yuav siv cov lo lus sib hwm sib qhuas, sib pab tas txhua yam hauv lub neej ntawm ob leeg, uas muaj lub luag hauj lwm thiab me tub me nyuam thiab lub cuab tam; yam li tej lo lus qhuas txog yus tus txiv los yus tus poj niam cov hauj lwm uas nws ua tau zoo los pab lub tsev neeg. Lo lus yus hais thiab qhuas txog, rov ua rau tus txiv los tus poj niam rov zoo siab cuag nkaus li rov ntxiv zog rau ob leeg txoj kev sib hlub thiab sib pab ua cov hauj lwm zoo dua mus ntxiv.

Kev cai thaum ib tug neeg nws muaj kev sib hlub lawm, mas yeej muaj lub siab tiaj tus tsis ntshaw txog lwm yam los lwm txoj kev ntxiv lawm. Vim nws pom lub neej zoo tshav ntuj nrig hauv yus lub neej, tsis muaj kev ntxhov.

Thaum peb muaj kev sib hlub, peb ua lub neej sib cuag nplooj qhua, muaj zog cuag li huab cua. Yus muaj kev sib tso siab zoo, vim yus txoj kev sib hlub loj tshaj lub cuab tam lawm.

Niaj hnub, yus muaj cov me tub me nyuam yug los, yus ob tug niam txiv tseem haj yam muaj kev sib nyiam sib hlub loj. Yus hlub yus tus me nyuam tsis tau paub dab tsi, uas lawv tos yus cev rau noj rau hnav xwb. Yog yus tsis hlub, ces tsis muaj neeg hlub lawm.

Yog li no thiaj paub tias Ntuj ua kom neeg muaj ntau txoj kev sib hlub mus raws lub neej laus zuj zus. Yuav hlub yuav qhuab qhia tej me nyuam kom txawj hwm Ntuj hwm yus cov ua niam ua txiv.

Yus kuj yuav tau qhuas txog lawv kev kawm ntawv tau zoo. Vim me nyuam, thaum yus ua niam ua txiv, yus muaj lus qhuas txog tej yam lawv tau ua zoo, mas lawv yuav nquag rov ua zoo dua. thiab lawv hlob, lawv thiaj hwm yus ua niam ua txiv thiab.

Yus yuav txhob tso yus tej me nyuam mus nrog luag nyob vim tsis zoo. Vim li cas hais tias ‘tsis zoo’? Rau qhov yus tus me nyuam ncaim ntawm yus mus thaum me mus nrog luag nyob hlob, mas yuav hwm luag lawm xwb. Tsis nco txog yus lawm, vim tsis nyob ze yus ua niam ua txiv. Lwm hnub tuaj, lawv hlob tiav; lawv yuav tsis rov los nrog yus lawm vim lawv yuav mus mloog luag hais lawm xwb. Ces lawv yuav mus ua lub neej ywj siab, tsis xav pom yus ua niam ua txiv lawm. P eb Hmoob tej laus yeej hais tias “Ua qoob los npaj tos tshaib tau noj, tu tub ki los npaj tos yus laus tau kev txib thiab vam khom.”

Yog li, thov kom peb cov ua niam ua txiv yuav los qhuab qhia tej me nyuam, kom coj tus yam ntxwv zoo- yuav coj lawv mus teev Ntuj niaj hnub chiv, kom lawv tau xyaum ua ib tug neeg zoo raws li Ntuj xav kom neeg ua rau Ntuj es Ntuj thiaj pub kom muaj me nyuam yug los.

Tus sau: XH. Lauj Vam Thaiv (1982)