VAJ QHIA FAS NTSHIS KUS TAWM MUS NTSIB TSOOM SID

Hnub itim 6 lub 8 hli 2019 no, Vaj Qhia Fas Ntshis Kus rov tawm mus ntsib tsoom pej xeem dua, vim Vaj Qhia tau ncua tsis tawm mus ntsib tsoom sid txij thaum lub caij ntuj qhua xyoo no los lawm. 6 xyoo uas Vaj Qhia Fas Ntshis Kus raug xaiv los ua Vaj Qhia, mas nws kheev kheev tawm mus ntsib tsoom pej xeem txhua txhua hnub 3 xws li yog hnub Wednesday nyob hauv niaj lis piam yog 280 zaug. Dhau ntawd lawm, Vaj Qhia kuj tseem ntuas sawv daws nyob hauv txhua Hnub Chiv los sis lwm lub hnub nyoog thiab. Txij xyoo 2013 los, dhau ntawm nthuav ntawv Moo Zoo lawm, Vaj Qhia tseem tawm nyob hauv cov caij xws li lub Caij Tos Huab Tais, lub Caij Txais Tshauv thiab lub Caij Yes Xus sawv rov los thiab. Vaj Qhia tau qhia txog cov Cim Ntshiab, qhia txog Leej Ntuj Plig Ntshiab cov txiaj ntsim, qhia txog lub Koom Txoos, qhia txog kev sib nyiam sib hlub hauv lub cuab yig thiab qhia txog Tswv Ntuj txoj kev hlub tsuj xeeb 25 xyoos los yog 50 xyoo. Vaj Qhia cov lus qhia zoo pab rau tsoom neeg ntseeg uas niaj hnub tuaj sib sau ua thaj txi Ntuj Hnub Chiv, koom cov kab ke lub Cim Ntxuav, kab ke lub Cim Daws Txhaum, Tswv Ntuj 10 lo lus qhia, hais zaj peb txiv nyob saum ntuj thiab tej zaj hais txog cov Hauv Paus Xa Lus. Vaj Qhia niaj hnub ntsib cov neeg tuaj tos ntsib Vaj Qhia thiab qhia txog tej yam xwm tseem ceeb rau sawv daws. Xam cov Vaj Qhia qhuab qhia tsoom sid txhua txhua hnub, mas muaj tshaj 20 yam uas tseem ceeb. Vaj Qhia thov kev ncaj ncees rau cov neeg raug xwv txheej los ntawm huab cua, thiab cov neeg muaj tej yam mob loj thiab nws thov Ntuj rau tas cov neeg thoj nam thiab cov neeg raug xwv txheej. Qhov loj tshaj mas yog kom sawv daws sib pab tiv thaiv thiab nrhiav kev daws kho lub ntiaj teb cov huab cua.

Hnub tim 6 lub 8 hli 2019 no, lub rooj Tswv Qhia nyob Aws Los Pas teb tau tsa ib lub rooj sab laj thiab caw kom cov neeg ntseeg sawv daws nrog koom, kom sawv daws thov Ntuj rau tib neeg pab txuag txhua yam nyob hauv lub ntiaj teb no, tsis hais kev txuag hav zoov thiab huab cua los sis yog tej yam qias neeg thiab cov hnab roj hmab. Sawv daws yuav siv lub sij hawm no los thov ntuj pab, kom ib tsoom neeg nrog txuag lub ntiaj teb kom ntshiab huv rau neeg nyob ntxiv mus. Vim lub ntiaj teb yog Tswv Ntuj tsim los rau tib neeg nyob, ces phim sawv daws yuav sib pab txuag kom ntshiab huv. Kev thov Ntuj, yuav pab kom neeg txawj sib zam txhaum thiab hloov siab ntsws los mus xaiv yam zoo. Ib tug neeg uas nws nquag thov Ntuj, mas nws yuav txawj zam txhaum thiab txawj hlub luag tej, txawj txuag tej yam zoo zoo nyob hauv lub ntiaj teb no, thiab txawj nrhiav yam zoo los sib pub sib pab neeg. Nyob hauv lub rooj sab laj, mas tus thawj coj ntawm cov Tswv Qhia Aws Los Pas tau hais kom sawv daws txawj ua Ntuj tsaug, vim Tswv Ntuj tau tsim ntau yam zoo zoo nyob hauv lub ntiaj teb los pub rau tib neeg ua tus kav, kom neeg txawj txuag thiab muab siab rau saib xyuas, txhob hnov qab txog tej yam zoo zoo uas Tswv Ntuj tau tsim pub rau neeg. Cov neeg ntseeg yuav muaj dej siab thiab txawj txuag txhua yam nyob hauv lub ntiaj teb no, tsis txhob muab siv luam thuam. Cov neeg ntseeg yuav ua ib tug piv txwv zoo hais txog kev txuag hav zoov thiab txhua yam nyob hauv lub ntiaj teb no.

Nod yog ib co lus tshwj xeeb hais txog Vaj Qhia Fas Ntshis Kus. Vaj Qhia Fas Ntshis Kus yog tus Vaj Qhia tim 266. Nws lub npe hu ua Hos Nkes Mas Lis Os, Npes Nkos Lis Os. Nws yug nyob hauv lub nroog Npuas Nos Ais Lem (Buenos aires), hnub tim 17 lub 12 hlis xyoo 1936. Nws muaj 5 leeg kwv tij. Vaj Qhia cog lus nyob hauv lub Koom Haum Yes Xus Is hnub tim 11 lub 3 hlis xyoo 1958. Xyoo 1967, Vaj Qhia kawm txuj tiav thiab nws txais lub Cim Tiag Tes ua Txiv Plig hnub tim 13 lub 12 hlis xyoo 1969. Nws tau ua tus choj cov Yes Xus Is hauv cheeb tsam nyob As Zees Tis Nas teb xyoo 1973 txog xyoo 1979. Tom qab ntawd Vaj Qhia tau ua tus saib cov kawm ua Leej Choj txog xyoo 1986. Nws tau ua Tswv Qhia nyob Npuas Nos Ais Lem hnub tim 28 lub 2 hlis xyoo 1998. Vaj Qhia Zam Paj Lug Ob tsa Tswv Qhia Fas Ntshis Kus ua Tswv Qhia Liab hnub tim 21 lub 2 hlis xyoo 2001, thiab Tswv Qhia Liab Fas Ntshis Kus tau txais ntau txoj hauj lwm nyob hauv Vas Tis Kas.