NTHUAV NTAWV MOO ZOO HNUB TIM 13/11/2019

Tuesday, November 12, 2019

LK 17 : 11-19

Kaum tus neeg mob ruas.

11 Yes Xus taug kev mus Yes Lus Xas Les, nws hla Xas Mas Lias thiab Nkas Lis Lais ciam teb. 12 Thaum Yes Xus yuav mus hauv ib lub zos, muaj kaum tus mob ruas tuaj cuag nws, lawv nres nrug deb. 13 Lawv tsa suab hais nrov rau nws tias : "Xib Hwb Yes Xus, thov koj khuv leej peb." 14 Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus, ces lawv lub cev huv. 15 Muaj ib tug hauv pab ntawd pom tias nws lub cev zoo lawm, ces nws tig hlo rov qab los, nws tsa suab nrov cav txog Tswv Ntuj. 16 Nws pe ntsej muag ti av rau ntawm Yes Xus ko taw, nws ua Yes Xus tsaug. Nws yog ib tug Xas Mas Lias. 17 Yes Xus thiaj tsa ncauj hais tias : Tsis muaj kaum leej rov huv tuaj lod ? Tshuav cuaj leeg ne, lawv dua qhov twg lawm? 18 Ua cas tsuas muaj tus qhua no xwb thiaj rov los cav txog Tswv Ntuj ?" 19 Ces Yes Xus hais rau nws tias : "Koj sawv mus, koj lub siab ntseeg cawm koj lawm."

Kwv tij sawv daws, nyob rau hauv Huab Tais Yes Xus tiam neeg, muaj cov neeg mob ruas coob heev, thiab cov mob ruas no raug cais thiab raug thaiv tsis pub chaws los hauv tej zej zog, nrog rau lub nroog Yes Lus Xas Les kuj ib yam thiab. Li ntawd, lawv thiaj tuaj tos kev ntsib Huab Tais Yes Xus puag tom tej ntug zos, los yog tom ntug kev. Thaum lawv tau ntsib Huab Tais Yes Xus lawm, lawv qw nrov nrov kom Huab Tais Yes Xus hnov lawv thiab pab kho lawv. Thaum Huab Tais Yes Xus kho lawv zoo tas, muaj ib tug uas yog neeg Xas Mas Lias rov los ua Huab Tais Yes Xus tsaug thiab cav txog Huab Tais Tswv Ntuj lub npe.

Kwv tij sawv daws, nyob rau hauv peb lub neej kuj zoo ib yam. Nyob rau tiam neeg no, lub ntuj yim dav, peb yim tau ntsib ntau hom neeg, tus zoo li cas los muaj, txawm tias, lawv zoo tsis xis peb siab, tsis kav, peb yuav tsum txawj sib hwm, thiab sib zam. Peb yuav tsum txawj hlub luag, peb tsis txhob ntxub ntxaug luag lwm tus, peb yuav tsis cais luag tawm ntawm peb, vim peb yog neeg ib yam, peb yuav tsum txawj sib hlub sib pab, thiab peb yuav nco ntsoov cav lus zoo txog Huab Tais Tswv Ntuj nyob rau hauv peb nruab siab, vim Tswv Ntuj yog tus pub ib puas tsav yam rau peb lub neej, thiab muaj tej zaum nws kuj coj peb los ntsib tej tus phooj ywg zoo.