PEB NTSIB TSWV NTUJ NYOB HAUV KEV THOV NTUJ

Vaj Qhia Fas Ntshis Kus rov xav txog tias ua cas peb yuav tsum thov Ntuj tsis tseg nyob hauv peb txoj sia.

Tim 10 lub 2 hlis xyoo 2021, Hnub Plaub hauv Lis Piam, Vaj Qhia Fas Ntshis Kus hais tias peb yuav muab kev thov Ntuj los tuav txoj kev teev Ntuj tau li cas. Vaj Qhia thiaj nthuav tias kev thov Ntuj rov coj kev teev Ntuj mus cuag kev ua neej nyob hauv txhua hnub.

Kev thov Ntuj yog kev txuas lus nrog Tswv Ntuj. Txhua txoj kev xyiv fab yog laj thawj hauv kev thov Ntuj; txhua zaus peb raug kev sim, mas yog caij nyoog zoo rau peb thov kev pab ntawm Tswv Ntuj. Li ntawd, kev thov Ntuj thiaj muaj sia nyob mus li; xws li cov thee ciaj ncaig.

“Cov ntseeg li lus thov Ntuj cog lub noob vam khom rau hauv neeg lub siab: txawm tias peb yuav ntsib xwv txheej dab tsi hauv peb txoj kev, Tswv Ntuj kev nyiam muaj peev xwm hloov kom ua yam xwm zoo tau.

Vaj Qhia muab Koom Txoos ib Lo Lus Qhia los piav lub ntsiab hauv lo lus no tias “Peb kawm kom paub txog kev thov Ntuj nyob hauv qee lub caij, nyob hauv kev mloog Tswv Ntuj Lo Lus thiab peb koom faib Leej Tub txoj kev cawm. Tiam sis Leej Ntuj Plig nyob hauv peb tas mus li, nyob hauv peb txhua hnub txhua sij hawm. Leej Ntuj Plig nyob hauv peb kom peb txawj thov Ntuj.”

Vaj Qhia hais ntxiv tias lub caij lub nyoog nyob hauv Tswv Ntuj xib tes. Li ntawd, peb ntsib Tswv Ntuj tsis yog nyob hauv nag hmo, los yog tag kis; tiam sis peb ntsib Tswv Ntuj nyob hauv hnub no.

Muaj ntau tus neeg ntsia lawv lub neej nyob hauv hnub tom ntej, lawv tsis nco txog hnub no. Lawv yog cov neeg ua neej nyob hauv kev npau suav thiab lawv tsis paub tias yuav coj lub neej nyob hauv hnub no tau li cas.

Peb thov Ntuj hloov hnub no ua ib lub txiaj ntsim pub rau peb. Peb thov Ntuj kom txoj kev npau taws nqig, thov kom txoj kev nyiam nyob ruaj khov, thov ntxiv kev xyiv fab kom ntau tuaj, thiab thov kom kev zam txim muaj zog tuaj.

Thov kom Ntuj lub txiaj ntsim nyob txawm hauv peb thiab ua hauj lwm nyob hauv peb; kom peb cov teeb meem txhob khuam peb cia, peb yuav thov Tswv Ntuj kom peb tau ntsib Tswv Ntuj.

Vaj Qhia ntuas tias “Thaum koj muaj kev npau taws los yog tsis zoo siab mas koj yuav ntsib kev iab. Koj yuav txwv nws cia thiab tig los nrhiav Tswv Ntuj. Tswv Ntuj yuav muab lus rau koj thiab ntuas koj kom rov zoo siab tuaj.”

Vaj Qhia caw cov ntseeg sawv daws kub siab thov Ntuj tsis tseg rau lwm tus; tsis hais tus yus tsis paub, los yus tus yeeb ncuab; yus kuj yuav thov Ntuj rau nws. Kev thov Ntuj yuav ua kom peb txoj kev nyiam phwj yaws tuaj.

Peb yuav thov Ntuj rau cov neeg tu siab, cov quaj nyiav vim lawv nyob ib leeg, rau cov tag kev cia siab tias tsis muaj tus twg hlub lawv lawm.

Vaj Qhia hais tias cov ntseeg li lus thov Ntuj yuav ua hwj huam tau nyob hauv Leej Pleev kev khuv leej: Huab Tais Yes Xus ntsia tsoom sid, lawv zoo li cov yaj tsis muaj tswv. Huab Tais Yes Xus hlub lawv, khuv leej lawv.

Huab Tais Yes Xus ua piv txwv tias nws tsis txiav txim rau lub ntiaj teb, nws tuaj cawm lub ntiaj teb. Ntawm peb los peb yuav thov Ntuj rau lwm tus tib yam nkaus.

Tus neeg nyiam txiav txim rau lwm tus thiab nyiam muab txim rau lwm tus; nws yuav muaj txoj sia zoo li cas, nws puas muaj kev xyiv fab tau. Li ntawd, Vaj Qhia thiaj thov kom peb sawv daws qhib siab dav zam txim pub rau lwm tus, khuv leej lawv thiab hlub lawv mos nyoos.

“Peb tsum nyiam txhua tus neeg, vim peb yog neeg txhaum, thiab vim Tswv Ntuj nyiam peb ib tug mus rau ib tug.”

Tib neeg yog yam Tswv Ntuj tsim los tsis muaj zog, tiam sis tib neeg muaj lub tswv yim paub tias kev thov Ntuj yuav ua kom tib neeg muaj tsim thiab muaj zog tau. Li ntawd, tib neeg tsum thov Ntuj txhua lub caij, txhua lub sij hawm vim Tswv Ntuj nyob ze tib neeg.

“Thaum peb thov Ntuj raws li Huab Tais Yes Xus lub siab, ces peb cov lus thov yuav muaj hwj huam tuaj.”