KEV THOV NTUJ PAB KOM PEB DIM HAUV KEV TUB NKEEG SAB NTSUJ PLIG

Hnub Chiv hauv Lis Piam 2 Caij Plaub Caug no Vaj Qhia Fas Ntshis Kus nthuav txog Huab Tais Yes Xus lub hwj chim tawm tuaj rau cov thwj tim pom, thiab nqua hu cov ntseeg kom muab kev thov Ntuj los ua qhov chaw vam khom rau lub ntiaj teb.

Ntawv Moo Zoo hauv Hnub Chiv yog cov lus hauv Mas Kos Ntawv Moo Zoo (MK9:2-10), mas Vaj Qhia ras txog lo lus Huab Tais Yes Xus hais rau cov thwj tim ua ntej no tias neeg Leej Tub yuav raug txom nyem, raug tua tab sis nws yuav sawv rov los. (MK8:31)

Vaj Qhia hais tias “Cov thwj tim vam txog tus vaj cawm haiv His Xas Lias tias yog ib tug vaj muaj hwj chim nto npe thiab yuav coj lawv dim hauv kev ua qhev, tab sis thaum lawv paub tias tus lawv tso tas puas tsav yam los raws nws qab ntawd yuav raug luag muab tua xws li ib tug neeg txhaum, mas lawv nroo thiab ntxhov siab kawg nkaus vim tsis mus zoo li lawv txoj kev npau suav.”

Vim lawv li kev ntxhov siab, mas Huab Tais Yes Xus thiaj coj 3 tus thwj tim nce mus saum ib lub roob siab. Nyob ntawd, Huab Tais Yes Xus ib ce hloov tas rau lawv pom. Qhov xwm no yog Huab Tais Yes Xus tab tom qhia lawv tias nws yuav yeej kev tuag.

Ntawv Moo Zoo sau tseg tias: Yes Xus cov ris tsho ci dawb paug, yog yam dawb ci uas nyob ntiaj teb no tsis muaj tshuaj yuav ua tau kom dawb li ntawd. Cov thwj tim ntshai kawg. Pob Zeb thiaj hais tias “Xib Hwb, peb nyob ntawm no mas hmoov zoo kawg!”

Vaj Qhia hais tias Pob Zeb lo lus no yog ib lo lus kom lawv ras tias Tswv Ntuj tsis pub kom muaj kev tsaus nti nyob hauv nws lo lus.

“Thaum peb raug kev ntxias, kev sim siab tsis muaj chaw xaus, peb yuav vam txog lwm thaj chaw los ntsia mas peb thiaj pom kev tawm ib yam li Huab Tais Yes Xus coj cov thwj tim mus saum roob siab kom pom dua lwm yam uas lawv ntsia tsis pom.”

Vaj Qhia ntuas ntxiv tias “Tab sis peb txhob tso peb kev xyiv fab thaum peb pom txoj hau kev ntawd ua rau peb poob rau hauv kev tub nkeeg sab ntsuj plig.”

Vaj Qhia nthuav lo lus ‘Kev Tub Nkeeg Huav Sab Ntsuj Plig’ no tias peb txhob nyob saum roob zoo siab nrog tej kev zoo nkauj uas peb ntsib peb pom, peb yuav rov nqes los nrhiv peb tej kwv tij ib yam li Huab Tais Yes Xus rov qab coj lawv nqes los.

“Kev tub nkeeg sab ntsuj plig ua rau peb txaus siab txog peb xwb, peb tsis nco qab txog lwm tus. Kev nce mus saum roob tsis yog kom peb hnov qab txog tej yam tseeb; kev thov Ntuj kuj tsis yog kom peb khiav deb ntawm txoj kev txom nyem hauv peb txoj sia.” Vaj Qhia ntuas.

Li ntawd, Vaj Qhia thiaj nqua hu cov ntseeg sawv daws kom hloov kev ntsib Huab Tais Yes Xus hauv kev thov Ntuj thiab kom cov ntseeg coj Huab Tais Yes Xus qhov ci ntsa iab no mus tsom rau lub ntiaj teb.

Cov ntseeg txoj kab xwm yog mus zes lub teeb me me hauv sawv daws lub siab kom cig pom kev rau lawv, lub teeb me me no yog lub teeb ntim txoj kev nyiam thiab vam khom.

Kawg no, Vaj Qhia thov niam Mab Liab tus tau txiaj ntsim puv siab los nrog sawv daws txais Leej Pleev qhov ci ntsa iab, thiab nrog cov ntseeg faib Leej Pleev qhov pom kev rau sawv daws cov kwv tij.