THOV NTUJ QHIB PEB MUS CUAG PEB LEEG HUAB TAIS

Hnub Plaub hauv Lis Piam 2 Caij Plaub Caug los yog tim 3 lub 3 hlis 2021 no, Vaj Qhia Fas Ntshis Kus ntuas cov ntseeg sawv daws tias lawv mus cuag Peb Leeg Huab Tais tau nyob hauv kev thov Ntuj, kev ua Huab Tais Yes Xus tsaug.
Vaj Qhia lo lus pib ntuas mas yog “Huab Tais Yes Xus yog tus qhib Tswv Ntuj lub Ceeb Tsheej rau peb thiab coj peb mus npuab Tswv Ntuj. Huab Tais Yes Xus yees tawm rau peb pom Tswv Ntuj; yog Leej Txiv, Leej Tub, thiab Leej Ntuj Plig Ntshiab.”
Vaj Qhia hais tias cov ntseeg tsum ua Huab Tais Yes Xus tsaug vim Huab Tais Yes Xus qhia peb thov Ntuj ces peb thiaj muaj ib lub zim txwv tau pom Tswv Ntuj lub hiav txwv dav tsis muaj ntug, yog txoj kev nyiam.
Vaj Qhia ntuas tias qee zaus Tswv Ntuj kuj tsis txaus siab rau peb cov lus thov Ntuj, thiab peb kuj tsis paub txog Tswv Ntuj kev tsis txaus siab ntawd. 
Tsis muaj ib lub laj thawj tseeb tias ua cas tib neeg thiaj tsum yog yam Tswv Ntuj nyiam, los yog ua cas Tswv Ntuj thiaj tsum hnov peb lub suab thov. Nyob hauv ntiaj teb neeg lub keeb mas tib neeg xav tias lawv tej dab ntuj nyob deb ntawm tib neeg thiab tsis kub siab rau tib neeg tej hauj lwm. Yog li tib neeg thiaj ua txhua yam kom haum cov dab ntuj lub siab.
Tsuas muaj Huab Tais Yes Xus tib tug xwb thiaj muaj cuab kav qhia kom peb ntseeg tias Tswv Ntuj nyiam tib neeg. Huab Tais Yes Xus qhia qhov no nyob hauv zaj paj lug tus tub loj leeb thiab zaj tus tswv zov yaj mus nrhiav tus yaj poob zoo.
Vaj Qhia hais tias yog peb tsis ntsib Huab Tais Yes Xus mas peb yuav tsis nkag siab tej xwm li hais los tau.

“Yuav muaj tus Tswv Ntuj twg yeem tuag kom tau txhiv tib neeg?
Yuav muaj tus Tswv Ntuj twg nyiam tib neeg tas mus li txawm tib neeg tig nraub qaum rau nws?
Yuav muaj tus Tswv Ntuj twg tsis chim rau nws tus me nyuam lwg nws tej cuab tam ua lwj ua liam tas?”

Huab Tais Yes Xus lub neej qhia peb kom pom txog tias Tswv Ntuj yog Leej Txiv uas nyob ze peb khuv leej peb thiab hlub tshua peb mos nyoos.
Yog tsis muaj Huab Tais Yes Xus mas peb yuav xam tsis pom Peb Leeg Huab Tais txoj kev nyiam kev hlub.