NTHUAV NTAWV MOO ZOO HNUB TIM 16/11/2019

LK 18 : 1-8

Thov Ntuj xws li tus poj ntsuam taij kom luag ua ncaj rau nws.

1 Yes Xus hais ib zag paj lug rau lawv, nws qhia lawv tias yuav tsum teev Ntuj tsis tseg, txhob ntaus siab yau. Yes Xus hais tias : 2 Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li. 3 Muaj ib tug poj ntsuam nyob hauv lub nroog ntawd tuaj cuag tus txwj laus txiav txim, nws hais tias : "Thov koj pab tsa kuv cai tiv tus neeg ntxub kuv." 4 Tus txwj laus tsis quav ntsej, nws ncua ntev ntev. Tab sis ntev mus nws xav tias : "Tab yog kuv tsis hwm Tswv Ntuj thiab tsis ntshai ib tug neeg li, 5 tsis kav tus poj ntsuam ntawd txob kuv dhau, kuv yuav tsa nws cai tiv tus ntxub nws, kom xwv nws txhob tuaj txob kuv thiab txhob ua kuv dias taub hau ntxiv." 6 Ces Huab Tais hais tias : "Nej mloog tus txwj laus txiav txim siab tsis ncaj cov lus saib. 7 Thaum Tswv Ntuj cov xaiv ua hnub ua hmo hu txog nws tsis tseg, Tswv Ntuj yuav tsis tsa lawv cai lod ? Nws yeej ua siab ntev rau lawv. 8 Kuv hais rau nej, Tswv Ntuj yuav tsa lawv cai sai sai. Tab sis thaum Neeg Leej Tub rov los, nws puas yuav pom neeg ntseeg nyob ntiaj teb ?"

Kwv tij sawv daws, kev teev Ntuj yog qhov ua kom peb txoj kev ntseeg thiab peb lub neej rhais chaw mus lawm tom ntej. Yog peb niaj hnub xwb, peb tsis teev Ntuj tsis thov Ntuj kiag li. Ces zoo li peb lub neej thiab peb tus ntsuj plig nyob qhov qub xwb, qee zaus tseem ua rau peb thaub qab zuj zus thiab kuj muaj. 

Li ntawd, txoj kev ntseeg zoo li cov roj teeb uas ua kom peb lub siab cig pom kev, kom peb kub siab teev Ntuj tsis tseg. Tab sis yuav ua li cas peb thiaj muaj txoj kev ntseeg ruaj khov. Nyob nyob peb cia li xav kom peb muaj txoj kev ntseeg zoo tuaj tsis tau. Peb yuav tsum teev Ntuj txhua txhia hnub thiab peb thov Huab Tais Tswv Ntuj txhab txoj kev ntseeg rau peb tas zog. 

“Thaum Neeg Leej Tub rov los nws puas yuav pom muaj neeg ntseeg nyob ntiaj teb.” Lo lus yog Huab Tais Yes Xus xav qhia peb tias ; yog peb xav tau txais yam uas peb thov peb yuav tsum muaj txoj kev ntseeg ruaj khov thiab peb yuav tsum nquag teev Ntuj tsis tu ncua.

Tus sau : Zoo Tswv Zov Yaj