KOOM TXOOS HAUV IS LAV TEB TXAWM MUAJ SIA NYOB

Nyob hauv Vaj Qhia Fas Ntshis Kus kev tawm rooj mus tsham cov ntseeg hauv Is Lav teb hauv lis piam tas los, mas Hnub Chiv tim 7 lub 3 hlis 2021, Vaj Qhia coj sawv daws ua Thaj Txi Ntuj ua ntej nws yuav rov qab. Vaj Qhia tau hais ib lo lus rau lub Koom Txoos hauv Is Lav teb li no “Kuv pom tias lub Koom Txoos hauv Is Lav teb txawm muaj txoj sia, Leej Pleev txawm muaj txoj sia thiab ua hauj lwm nyob hauv cov neeg ntshiab thiab ntseeg txog nws.”

Vaj Qhia siv Leej Ntshiab Paj Lug nqe lus tias : Yes Xus yog Tswv Ntuj lub zog, Yes Xus yog Tswv Ntuj kev thoob tsib. (1KLN1:24)

Huab Tais Yes Xus nthuav nws lub zog thiab kev thoob tsib rau peb pom nyob hauv kev zam txim thiab khuv leej neeg.

Vaj Qhia pib ntuas tias “Ntau zaus mas peb poob rau lub tswv yim xav tias kuv tsum ua kom lwm tus pom txog kuv lub zog los kuv kev thoob tsib. Vim lub tswv yim li hais mas peb thiaj siv dag siv zog los tswj lwm tus. Qhov tseeb, peb sawv daws vam txog Tswv Ntuj lub zog thiab Tswv Ntuj kev thoob tsib nyob hauv Yes Xus tus raug ntsia saum Ntoo Cuam.”

Yog peb rov los saib Ntawv Moo Zoo hauv Hnub Chiv Lis Piam no, peb yuav pom tias Huab Tais Yes Xus ntiab cov ua luam hauv lub Tuam Tsev Teev Ntuj li cas.

“Leej Txiv Tswv Ntuj xa Yes Xus tuaj ntxuav lub Tuam Tsev Teev Ntuj uas neeg muab pob zeb txhim, tshwj zias tsham mas yog ntxuav lub Tuam Tsev Teev Ntuj hauv neeg nruab siab.” Vaj Qhia nthuav nqe lus hauv Ntawv Moo Zoo, “Tib neeg lub siab tsum raug ntxuav kom txhob lo tej cuab tam, hwj chim, nyiaj txiag kev haub ntxias.”

Vaj Qhia ntuas ntxiv tias peb yuav ntxuav peb lub siab raws peb lub tswv yim xwb tsis tau, tsuas muaj Huab Tais Yes Xus tib tug xwb thiaj yuav ntxuav peb cov hauj lwm tsis huv tau; Huab Tais Yes Xus muaj lub zog yeej kev phem, muaj peev xwm kho peb qhov mob thiab txhim dua ib lub Tuam Tsev tshiab nyob hauv peb.

Huab Tais Yes Xus tsis yog daws peb tej txhaum xwb, Huab Tais Yes Xus tseem faib nws lub zog thiab kev thoob tsib rau peb thiab.

“Huab Tais Yes Xus tso peb dim hauv peb lub tswv yim nqaim xav txog peb cuab peb yig, peb pawg ntseeg, cov nyob ib ncig peb; kom peb qhib txoj kev xav kom dav kom deb txog kev txhim tsa lub Koom Txoos thiab lub sim ceeb vov tas nrho peb cov kwv tij uas lawv tab tom vam txog kev cawm ntawm peb.”

Vaj Qhia hais tias Huab Tais Yes Xus ntxiv zog rau peb kom muaj peev xwm tawm tsam kev pauj kua zaub ntsuab txoj kev ntxias, thiab Huab Tais Yes Xus xa peb mus ua tim khawv txog lub Moo Zoo lub zog pab kom peb hloov txoj sia tshiab tsis yog kom peb mus hloov lwm tus li kev teev hawm.

Huab Tais Yes Xus hais tias peb hnub xwb mas nws yuav rov tsa tau lub Tuam Tsev luag muab rhuav ntawd kom ntseg. Lo lus no yog Huab Tais Yes Xus hais rau peb tias nws yuav saib xyuas peb nyob hauv kev puas tsuaj vim kev tsis ncaj ncees, kev tawg ua pab ua pawg, thiab hauv kev ntxub ntxaug.

Vaj Qhia hais tias Huab Tais Yes Xus xav ntxuav neeg kev mob kev txom nyem thiab txhim kev thaj yeeb nyab xeeb tshiab rau lawm tom ntej.

“Nyob hauv lub teb chaws no, Tswv Ntuj lub txiaj ntsim tab tom ua hauj lwm hnyav kom tau tshaj txog kev thoob tsim dai saum tus Ntoo Cuam, yog txoj kev zam txim thiab khuv leej.”