NTHUAV NTAWV MOO ZOO HNUB TIM 17/11/2019

LK 21 : 5-19

Ntau hom xwv txheej yuav tshwm sim.

5 Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj paj tshab txi Ntuj zoo saib. Yes Xus hais tias : 6 "Tej uas nej qhov muag ntsia ntawm no, muaj ib hnub luag yuav rhuav tsis tseg ob lub pob zeb txhim sib tshooj sawv ntsug." 7 Lawv nug Yes Xus tias : "Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi thaum tej ntawd yuav tshwm sim tuaj ?”

 8 Yes Xus hais tias : "Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : 'Yog kuv', thiab yuav hais tias : 'Lub zim txwv twb los txog ze ze lawm'. Mas nej txhob mus raws lawv. 9 Thaum nej hnov luag tham txog kev tsov rog thiab kev kub ntxhov, mas nej tsis txhob ntshai. Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd." 10 Yes Xus hais rau lawv tias : "Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. 11 Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev tshaib. Yuav muaj tej yam xwm txaus ntshai kawg, thiab tej lub cim loj nyob saum ntuj. 12 Tab sis ua ntej ib puas tsav yam ntawd, luag yuav cev tes ntes nej, luag yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe. 13 Tej ntawd yuav pub ib lub zoo sij hawm rau nej ua tim khawv. 14 Nej khaws rau nruab siab tias nej yuav tsis txhob npaj ib co lus teb kom txuag tau nej. 15 Vim kuv yuav muab ib co lus thiab ib txog kev thoob tsib rau nej, ces cov ntxub nej yuav tsis muaj ib tug teb tau thiab cav tau nej cov lus. 16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej. Luag yuav muab nej ib txhia tua. 17 Luag yuav ntxub nej vim kuv lub npe. 18 Tab sis tsis muaj ib txoj plaub hau saum nej taub hau yuav ploj. 19 Nej ua siab ruaj kom tom thawj, ces nej yuav cawm nej txoj sia."

Kwv tij sawv daws Leej Ntshiab Paj Lug xav hais qhia peb cov ntseeg sawv daws tias ; txawm tias peb ua tsis tau ib yam dab tsi zoo, los thov kom peb tsis txhob ua lub nra rau luag ris, peb tsis txhob cia luag ua ntau dua yus, peb tsis txhob hais tias peb tsis paub ua dab tsi. Peb tsis txhob tos tias, tag kis peb mam ua, los yog lwm hnub peb mam xyaum ua, vim lub sij hawm muaj tsis ntev rau peb. Peb tsis paub tias peb yuav muaj txoj sia nyob txog hnub twg. Thaum hnub kawg ntawm peb los txog, ces peb twb tsis tau ua ib yam dab tsi tiav li. Ces txhua yam yuav lig dhau rau peb lawm. 

Nyem no yog peb lub sij hawm uas Tswv Ntuj pub rau peb, kom peb yuav ua tim khawv txog Huab Tais Tswv Ntuj lub npe. Peb yuav ua tim khawv tias peb yog Tswv Ntuj cov me nyuam. 

Kwv tij sawv daws, kev ua tim khawv, tsis yog tias yus yuav muab yus txoj sia los tuag ua tim khawv txog Tswv Ntuj lub npe zoo yam li cov Huab Tais Yes Xus cov Thwj Tim. Tiam sis, kev ua tim khawv, yog yus siv yus lub neej thiab txoj sia los ua ib tug neeg ntseeg Ntuj zoo, thiab coj zoo rau ntiaj teb sawv daws pom tias, yus yog ib tug neeg ntseeg Ntuj zoo, yus coj zoo. Yus ua ib tug qauv zoo rau yus tej kwv tij phooj ywg los sis yus tej me nyuam. Qhov no yog ib yam uas peb muaj peev xwm ua tau. Thiab Tswv Ntuj xav kom peb ua.

Peb yuav tsum ua zoo txhua txhia hnub, zoo yam li peb tshuav peb niam peb txiv tus nqi zog thiab peb tshuav Huab Tais Tswv Ntuj nqi zog, es peb yuav tsum pauj kom tas nyob rau tiam no. Ces thaum txog hnub kawg peb thiaj dim.

Tus sau : Zoo Tswv Zov Yaj