IB TUG NEEG KHAS PHUS CHAS RAUG NTES, VIM XYAV MOO TXOG SUAV COV VACCINE

Friday, March 26, 2021

Lub lis piam tag los, cov tub ceev xwm Khas Phus Chas ntes ib tug tub tseev tsim uas nws raug lub txim tias txw kom neeg tsim kev kub ntxhov, vim nws xyav moo tsis zoo txog Suav cov Vaccine. Nws hais tias Suav cov Vaccine tsis zoo thiab ua rau neeg tuag ntau leej lawm. Thorn Kimsan yog ib tug tub tseev tsim nyob hauv pab nom Cambodia National Rescue Party (CNRP), nws raug ntes hnub tim 14 lub 3 hlis no. Cov tub ceev xwm hais tias : cov lus nws sau tso tawm hauv facebook ua kom ib zeej tsoom neeg nkag siab yuam kev. Cov lus Thorn Kimsan sau yog li no :

“Suav cov Vaccine ua kom rau neeg Khas Phus Chas tuag thiab nov tsis yog qhov tseeb” Txhais tias Thorn Kimsan cov lus mas yog xav ua kom muaj kev kub ntxhov thiab ua kom neeg nkag siab yuam kev ntag.

Txawm li cas kuj xij, Thorn Kimsan tus ntxhais hais tias nws niam raug ntes vim muaj neeg hiam thiab kev tsis ncaj ncees. Thorn Kimsan yog tus tub tseev tsim nyob hauv pab nom Cambodia National uas raug ntes ua tus kawg nkaus. Cov tub ceev xwm ntes Thorn Kimsan, mas tsis xub muaj daim ntawv tso cai ntes thiab tsis muaj ib lo lus qhia qhov tseeb txog qhov nws raug ntes rau nws tsev neeg paub li.

Txij lub 7 hli tsaib no los txog hnub tim 15 lub 3 hlis xyoo no, mas twb muaj cov neeg raug ntes ze ntawm 80 leej lawm. Yog cov neeg txhawb nqa tsoom pej xeem thiab cov hauj sam teev hawm Phus Thas. Muaj 2 tug tub tseev tsim nyob hauv pab nom CNRP hais tias Thun Chantha thiab May Sophon xub raug ntes ua ntej, kuj yog vim nkawd sau ntawv nyob hauv facebook hais txog cov Vaccine uas tsim nyob Suav teb. Hnub tim 16 lub 3 hlis no, Khas Phus Chas teb tshaj tawm thawj tug neeg tuag los ntawm tus kab mob Covid-19. Tam sim no Khas Phus Chas teb muaj cov neeg mob Covid-19 1,325 leeg. Khas Phus Chas teb pib hno tshuaj Vaccine tiv thaiv tus kab mob Covid-19 lub hlis tag los lawd.