COV PAS KAS YOS NTAU TXHIAB LEEJ UA NEEG THOJ NAM NKAG THAIB TEB

Cov Pas Kas Yos tshaj 3,000 leej hauv lub xeev Karen khiav ua thoj nam tawm ntawm lawv tej vaj tse mus rau Thaib teb, vim yog cov tub rog Mias Mas siv dav hlau tua lawv tej vaj tse piam sij tas. 
Hnub tim 28 lub 3 hlis no tag los, cov tub rog Mias Mas tau siv dav hlau pov hoob pob hlawv cov Pas Kas Yos tej vaj tse 5 qhov chaw, nyob hauv lub nroog Lu Thaw, Mutraw thiab cov thoj nam uas nyob ntawm ciam teb. Tam sim no muaj cov Pas Kas Yos nkaum nyob hav zoov hav tsuag, qab zeb qab ca thiab lawv ntshai kawg. Cov xeev uas muaj cov neeg ntseeg nyob coob, lawv pom txog kev sib tawg ntawm Karen KNU thiab cov tub rog Mias Mas los tshaj 60 xyoo lawm. Ua rau lub teb chaws muaj cov neeg khiav ua thoj nam tshaj 100 txhiab leej, thiab feem coob yog cov Pas Kas Yos uas nyob raws ciam teb npuas Thaib teb.
Kev tua cov Pas Kas Yos zaum kawg nyob hauv lub xeev Karen, yog tib hnub uas cov Karen KNU txeeb lub yeej tub rog Mias Mas nyob ze ciam teb, ua rau neeg tuag 10 leej. Cov Pas Kas Yos muaj 5 plhom leej nyob hauv tsoom pej xeem Mias Mas tas nrho 54 plhom leej, thiab yog haiv neeg tsawg uas coob tim 3 nyob Mias Mas teb. Cov Pas Kas Yos feem coob yog teev hawm Phus Thas. 15 feem pua yog teev hawm kev ntseeg. Muaj coob leej Pas Kas Yos txais kev ntseeg los ntawm cov tub tshaj Ntuj Lus pej kum teb hauv tiam 19.