NYUS DES LIS TXWV TSIS PUB XA VACCINE TAWM MUS LWM LUB XEEV

Kev sib kis ntawm tus kab mob Covid-19, ua rau Nyus Des Lis txiav txim siab txwv tsis pub xa Vaccine tiv thaiv tawm mus lwm qhov chaw, vim yav tag los cov Vaccine raug xa tawm mus txwv xeev ntau dua cov Vaccine siv nyob hauv tuam ceeb Nyus Des Lis. Thiab cov tseem hwv Is Ntias tshaj tias kev siv Vaccine hauv Nyus Des Lis tseem ceeb dua. Cov Vaccine uas raug xa mus rau lwm cov xeev uas pluag txom nyem, yog hom Vaccine Sinovac, Sinopharm uas tuaj Suav teb tuaj thiab hom Vaccine Sputnik.V uas tuaj ntawm Lav Xias teb tuaj.
Kev tshaj tawm hais txog txwv tsis xa Vaccine tawm mus rau lwm lub xeev, tsis tau txhais tias yuav txw tu nrho. Tsuas yog kev ncua ib ntus xwb, vim tias tam sim no muaj ntau lub xeev nyob Is Ntias teb tab tom kub ntxhov heev. Tab sis kev txwv tsis pub xa Vaccine tawm mus txawv xeev, mas kuj ua teeb meem rau cov xeev uas muaj cov pej xeem pluag txom nyem loj kawg. Lub lis piam tag los, muaj 1.2 plhom hwj tshuaj Vaccine raug xa tawm mus txawv teb chaws mus rau Npees Las Des teb, muaj tus thawj pwm tsav Is Ntias ua tus cev cov tshuaj ntawd nyob hauv lub tuam ceeb Kas Thas nyob Npees Las Des. 
Txij lub 1 hlis ntuj los, Is Ntias teb tau xa tawm hom Vaccine AstraZeneca 63.3 plhom hwj, feem ntau yog tsim los ntawm Serum Institute Of India (SII), hauv lub nroog Pus Nes (Pune). Tseem hwv Is Ntias yuav 10.1 plhom hwj tshuaj Vaccine thiab xa mus rau txhua txhua lub xeev yam tsis xam nyiaj txiag li. Qhov no yog ua raws Suav thiab Lav Xias txoj cai. Zim txwv no Suav teb thiab Lav Xias teb tau cov nyiaj muag tshuaj Vaccine los ntawm As Xias As Fiv Kas thiab Latin America ntau kawg.