CHEEB KOOM TXOOS MOOS NPAIS PAB COV NEEG PLUAG THEM NQI KHO MOB

Kev sib koom tes ntawm cov yim neeg ntseeg Kav Tos Liv, tab tom pab them nyiaj kho mob rau 2,000 tawm tus neeg mob nyob hauv lub tuam ceeb Moos Npais, nyob Is Ntias teb. 
Tus thawj coj Emeritus Percival Fernandez tau txhim tsa Corpus Fund thaum lub 3 hlis tim 1 xyoo 2006, raws li kev xav tau ntawm cov tsev neeg txom nyem uas tsis muaj peev xwm them nyiaj rau tsev kho mob thiab lwm yam nqi kho mob. Nyob hauv 15 xyoos ntawm Corpus Fund, mas tau pab 58,000 tsev neeg pluag txom nyem lawm. Tam sim no tseem yuav pab 2,016 yim neeg ntxiv mus, vim muaj neeg pab txhawb nqa. Cov hauj lwm no yog los ntawm cov neeg zoo siab ua hauj lwm pub dawb. Raws lub Cheeb Koom Txoos peev nyiaj txiag, mas txhua txhua yim neeg yuav tsum tau txais 750,000 Lus Pis. Tswv Qhia Fernandez uas tam sim no nws muaj 85 xyoos, mas nws soj ntsuam xyuas rawv txog cov neeg pab nyiaj thiab cov tau txais kev pab, ces Tswv Qhia xav ua lawv tsaug ib tug zuj zus.
Tswv Qhia Fernandez yug nyob hauv lub nroog Bangalore xyoo 1936, nws tau txais lub Cim Tiag Tes ua Leej Choj nyob Npoos Npes hnub tim 21 lub 12 hlis 1960. Xyoo 1978 Tswv Qhia Valerian Gracias xa nws mus nyob Bangalore kom nws ua tus thawj tswj saib xyuas lub tsev kho mob Saint John, uas yog qhov chaw sab laj ntawm cov Tswv Qhia Kav Tos Liv nyob Is Ntias teb. 
Hauv cov xyoo 1970, Tswv Qhia Fernandez tau ua cov hauj lwm pab tsoom pej xeem uas txom nyem los ntawm lub ntuj qhuav thiab nws tau ua hauj lwm pab tsoom pej xeem nyob Us Nkas Ntas teb thiab nyob Npees Las Des teb.