KEV NYIAM YOG KEV TSOB HWB TSIS YOG KEV TSWJ LWM TUS

Nyob hauv Vaj Qhia kab ke thov Ntuj cav txog Poj Huab Tais hauv Hnub Chiv tim 9 lub 5 hlis 2021 no, Vaj Qhia ras txog kev nyiam lwm tus raws li Huab Tais Yes Xus qhia tias yog ua cov hauj lwm tsob hwb luag.
Zam Ntawv Moo Zoo (Z 15:9-17) yog piav txog Huab Tais Yes Xus qhia kom cov thwj tim sis nyiam sis hlub, thiab lub txiv tawg hauv txoj kev nyiam. Vaj Qhia hais tias Huab Tais Yes Xus caw peb los nyob hauv nws txoj kev nyiam, kom xwv nws txoj kev kaj siab nyob hauv peb thiab peb thiaj tau txais kev kaj siab nyob puv hauv peb.
Txoj kev nyiam no tawm ntawm Leej Txiv Tswv Ntuj tuaj, txoj kev nyiam no ntws xws li tus dej ntawm Huab Tais Leej Tub tuaj txog peb sawv daws.
Txoj kev nyiam uas Huab Tais Yes Xus pub rau peb, zoo puav tam li Leej Txiv nyiam Leej Tub: yog txoj kev nyiam ntshiab huv, tsis muaj chaw xyeej, thiab yog txoj kev nyiam pub dawb.
Yog vim li no Huab Tais Yes Xus thiaj saib peb yog nws cov phooj ywg, nws ua kom peb paub Leej Txiv, thiab Huab Tais Yes Xus raus tes nrog peb nyob hauv txoj hauj lwm tsim txoj sia rau ntiaj teb.
Peb nyob hauv Huab Tais Yes Xus txoj kev nyiam, yog peb khaws Huab Tais Yes Xus lo lus qhia. Yog lo lus hais tias “Nej yuav sis nyiam sis hlub ib yam li kuv nyiam nej.”
Vaj Qhia hais tias nyiam ib yam Leej Pleev nyiam txhais tias tawm kom dhau ntawm yus tus kheej mus txais cov neeg xav tau kev cawm ntawm yus. Nyiam li Huab Tais Yes Xus nyiam yog tsob hwb koj cov kwv tij nkauj muam ib yam li Huab Tais Yes Xus ntxuav cov thwj tim ko taw.  Yog ua kom peb tus kheej muaj qab hau. Txhais tias

‘kev nyiam tsis yog lo lus xwb, 
tiam sis kev nyiam yog kev nqes tes ua rau luag pom’

Huab Tais Yes Xus kev nyiam hu kom peb tso ntiaj teb txoj kev nyiam pov tseg, xws li kev nyiam nyiaj txiag, suab npe, los yog hwj chim.
Cov kev haub ntxias no yuav ntxia peb kom tawm deb hauv Tswv Ntuj txoj kev nyiam thiab rais peb ua ib tug neeg qhia dub, nyiam tus kheej thiab muab hlob.
Kev muab hlob ua rau peb txoj kev nyiam thaub qab, rhuav lwm tus, thiab tsim kev tu siab rau tus nyiam peb.
Vaj Qhia ras txog cov poj niam uas tab tom poob hauv kev txom nyem vim kev hlub txia ua kev kub ntxhov. Kev hlub li ntawd tsis yog kev nyiam.
 Nyiam li Tswv Ntuj nyiam, yog qhuas thiab hwm tus nyob ib ncig peb raws li lawv tus yam ntxwv.
Tsis tas li, kev nyiam li Tswv Ntuj nyiam, yog uv kom dhau yus txoj kev xav tswj luag lwm tus.
Peb kev kaj siab yog Tswv Ntuj nyiam peb txawm tias peb tau ntxeev siab rau Tswv Ntuj ntau zaus. Li ntawd, peb thiaj muaj chaw tso siab thaum peb ntsib kev haub ntxias.
“Cov me nyuad, nej yuav ua neej nyob hauv kev kaj siab mog!”
Ua ntej yuav xaus cov lus ntuas, Vaj Qhia kom sawv daws thov poj Huab Tais uas yog niam Mab Liab tus tau txiaj ntsim puv siab, kom nws pab peb ua siab ruaj nyob hauv Huab Tais Yes Xus txoj kev nyiam thiab kom peb loj hlob nyob hauv txoj kev nyiam, kom peb sawv daws tau ua tim khawv txog kev kaj siab nyob hauv kev sawv rov qab los.