YES XUS NROG PEB NYOB NRAIM

Vaj Qhia rov tawm tuaj ntuas tsoom ntseeg nyob hauv Hnub Plaub hauv Lis Piam 6 Caij Hla no tias kev thov Ntuj yog ib yam tsis yooj yim kiag li, thiab muaj cov neeg ntseeg tseem ceeb puas tsawg leeg tau yeej txoj kev qaug zog rau kev thov Ntuj no tau.
“Kev thov Ntuj zoo puav tam li yog cov ntseeg txoj sia, tsis zoo li thaum peb mus nuam yaj.” Vaj Qhia pib hais tawm hauv cov kab sab rau sawv daws mloog, “Nyob hauv Ntawv Ntshiab peb yuav pom tias muaj coob leej ntau tus lawv tsis tau kev xis cev thaum lawv thov Ntuj, tiam sis tej no yog pab txhawb peb kom txhob hnov qab tias Huab Tais Yes Xus nrog nraim peb.”
Cov ntsiab lus hauv hnub no mas Vaj Qhia xav qhia tsoom ntseeg txog ‘kev tawm tsam sab ntsuj plig’ thiab xav qhia tias cov neeg tseem ceeb hauv Koom Txoos liv xwm mas lawv ras tias kev thov Ntuj tsis yog ib yam yooj yim rau ntiaj teb neeg.
Vaj Qhia hais tias txhua zaus thaum peb thov Ntuj, yuav muaj tej yam los looj koov peb lub tswv yim kom tig mus xav txog lwm yam, thiab ntxias peb lub tswv yim tias tej yam ntawd tseem ceeb dua thiab tsim nyom xub ua ua ntej kev thov Ntuj. Tom qab thov Ntuj lawm, peb mam ras tau tias tej lub tswv yim ntawd tsis muaj txiaj ntsim dab tsi li thiab tsis muaj qab hau rau peb.
Vaj Qhia piav tias cov neeg ntshiab txheej thaud, lawv yeej tau seev txog kev nkees thiab tsis qab siab thaum lawv thov Ntuj thiab lawv ua tiag nyiaj txeem kom dhau los tau ntev xyoo.
Kev nyob ntsiag to, kev thov Ntuj thiab kev yoog lub tswv yim kom feeb meej yog ib qhov nyuaj kawg, thiab qee zaus kuj yog kev khaj cai raws ntiaj teb neeg.
Kev ntseeg los yeej zoo tib yam li ntawd thiab, qee zaus txoj kev ntseeg kuj coj peb mus nyob hauv qhov tsaus ntuj nti.
Nyob hauv cov lus qhia mas hais txog kev thov Ntuj tus yeeb ncuab tias muaj ntau muaj coob, tab sis yog qhia rau peb paub tias txawm kev thov Ntuj yog Tswv Ntuj lub txiaj ntsim pub dawb rau tib neeg, los tej zaum kuj cuam tshuam nrog yam neeg to taub, neeg kev qaug zog, neeg kev tu siab los chim siab.
“Muaj nej tej tus xav tias lo lus thov Ntuj mus txog Tswv Ntuj, yog li ua cas Tswv Ntuj ho tsis teb neeg cov lus thov? Yog thaum nej ua xyem xyav tias kev thov Ntuj yog ib txoj kab xwm hauv sab kev xav xwb; nws muaj qab hau tab sis tsis muaj tseeb thiab tsis muaj txiaj ntsim dab tsi: tus twg los puav leej ua tau.” Vaj Qhia hais, “mas tus yeeb ncuab loj tshaj nyob hauv peb.”
Vaj Qhia hais ntxiv tias peb tsum rov nug tus kheej saib thaum peb poob rau txoj kev nxtias li no mas peb yuav ua li cas. Vaj Qhia muab ib zaj hauv liv xwm los hais ua piv txwv yog zaj hais txog Leej Ntshiab Is Nas Xyus hauv Los Yos Las. Zaj no yog qhia txog kev tu yus txoj sia kom muaj qib muaj txheem: qhia kom peb nkag siab tias lo lus hu peb los ua ib tug ntseeg yog yam ruaj tawv, yog txoj kev txiav siab los nyob hauv Huab Tais Yes Xus tus ntxoov ntxoo thiab kub siab ua txoj hauj lwm zoo txawm tias tsis yooj yim kiag li.
Dua li Vaj Qhia kuj tau muab kev tso siab rau sawv daws tias cov ntseeg sawv daws tsis nyob tib leeg hauv ntiaj teb no, lawv muaj tus saib xyuas thiab pov hwm lawv. 
Vaj Qhia muab Leej Ntshiab As Thov Nis Xyus kev raug dab phem ntxias los ua piv txwv tias “Thaum As Thov Nis Xyus ua Txiv Twj Cuab mas nws raug ntxias tas ib sid, tab sis nws tsis yeem poob rau kev ntxias. As Thos Nis Xyus ua tiag nyiaj, nws cem Tswv Ntuj tias ‘Huab Tais, thaum kuv hu txog koj, koj nyob qhov twg? Ua cas koj tsis los pab kuv? Koj puas paub tias kuv ntxhov siab npaum li cas?’
As Thos Nis Xyus hnov Huab Tais Yes Xus lub suab hais rau nws tias ‘As Thos Nis Xyus, kuv nyob ntawm no. kuv tab tom saib koj ntaus rog nrog koj txoj kev haub ntxias.’
Thuam As Thos Nis Xyus hnov li ntawd, nws lub tswv yim thiaj rov tiaj tus.”
Vaj Qhia rov hais dua ib zaj, yog hais txog nws tus kheej. Vaj Qhia hais tias “Thaum txiv tseem nyob As Zees Tis Nas, muaj ib tug hluas neeg, nws niaj lis piam tsis tuaj koom ua Thaj Txi Ntuj, tab sis nws khiav kev mus thov Ntuj hauv lub tsev teev Ntuj niam Mab Liab yees tawm hauv Lus Ntsas uas deb li 70 Km. Thaum nws tuaj txog mas yog lub caij 10 teev tsaus ntuj lawm, lub tsev teev Ntuj qhov rooj los kaw tas. Tus hluas ntawd nyob ntawm ib sab qhov rooj thov Ntuj ib hmos txog sawv ntxov, lub qhov rooj tsev teev Ntuj qhib, nws thiaj chaws mus sab hauv mus nrhiav niam Mab Liab. Nws ua li ntawd vim nws vam tias nws tus me ntxhais tus mob yuav khees.
Niam Mab Liab pom txog nws txoj kev mob siab thiab ua tiag txeem kom tau cev lus rau niam Mab Liab, ces niam Mab Liab mloog nws lo lus thov, nws tus me nyuam dim hauv kev mob.”
Vaj Qhia hais ntxiv tias peb thov lub txiaj ntsim raw li peb xav tau, tab sis yog peb tsis ua tiag nyiaj mas peb yuav tsis tau raws li peb thov. Vim kev thov Ntuj yog kev rov nrog yus sib ntaus rog, yog muaj Huab Tais Yes Xus nyob ib sab ntsia ntsoov peb.
Huab Tais Yes Xus tau hais tias thaum nej poob hauv qhov tsaus ntuj nti, nej ntsia tsis pom kuv, kuv yuav ua nej ntej. Li ntawd, yog peb rov tig ntsia peb txoj sia yav dhau los mas peb yuav pom tias peb tsis yog nyob ib leeg xwb, peb muaj Huab Tais Yes Xus nrog nraim peb.