HUAB TAIS YES XUS MUS SAUM NTUJ COJ KEV KAJ SIAB TUAJ RAU PEB

Hnub Chiv hwm Yes Xus mus saum Ntuj hauv xyoo no Vaj Qhia hais tias Huab Tais Yes Xus yog Tswv Ntuj tseeb thiab tib neeg tseeb thiab Huab Tais Yes Xus cog lus tias yuav xa Leej Ntuj Plig Ntshiab nqes los, mas yam no thiaj yog lub hauv paus hauv kev kaj siab.
Tim 16 lub 5 hlis xyoo 2021 no, Vaj Qhia Fas Ntshis Kus rov tawm tuaj nthuav Ntawv Moo Zoo rau tsoom ntseeg sawv daws tias Huab Tais Yes Xus mus saum Ntuj zaum no tsis ua rau nws cov thwj tim muaj kev tu siab tias lawv yuav raug tso ua ntsuag nos nyob hauv lub ntiaj teb, tab sis lawv kaj siab thiab muaj lub siab kub lug tawm mus tshaj lub Moo Zoo rau tas ntiaj teb neeg.
“Ua cas lawv tsis tu siab?” Vaj Qhia hais “Ua cas peb ho zoo siab thaum pom Huab Tais Yes Xus nce mus saum Ntuj?”
Vaj Qhia rov teb cov lus no tias yog Huab Tais Yes Xus nce mus saum Ntuj li no, mas nws txoj hauj lwm thiaj tiav nyob hauv peb.
Huab Tais Yes Xus nqes los ua neeg thiab txhiv neeg hauv kev txhaum tas, mas ziag no Huab Tais Yes Xus thiaj rov nce mus saum Ntuj, Huab Tais Yes Xus coj neeg daim nqaij daim tawv nrog nws mus. Huab Tais Yes Xus thiaj yog thawj tus tib neeg tau nkag mus hauv Tswv Ntuj lub Ceeb Tsheej, vim Huab Tais Yes Xus yog tseem Tswv Ntuj thiab tseem tib neeg. Li ntawd, peb thiaj muaj kev kaj siab.
Huab Tais Yes Xus mus saum Ntuj zaum no tsis yog nws tso peb pov tseg, vim Huab Tais Yes Xus tseem nrog nraim nws cov thwj tim uas yog peb. Huab Tais Yes Xus thws nws cov qhov txhab txhiv peb rau Leej Txiv saib. Huab Tais Yes Xus muab kev kaj siab, kev xyiv fab loj tas nrho rau peb.
Dhau ntawm cov lus hais los no, mas peb kaj siab vim Huab Tais Yes Xus cog lus tias nws mus saum Ntuj mas Leej Ntuj Plig thiaj yuav nqes los. Leej Ntuj Plig Ntshiab yuav los coj peb mus tshaj lub Moo Zoo rau lwm tus. 
Vim li hais ces peb cov ntseeg thiaj yuav kaj siab nyob hauv hnub no. Li ntawd, peb los thov niam Mab Liab, peb tus Poj Huab Tais kom nws pab peb ua siab loj, muaj cuab kav ua tim khawv zeem tseeb txog txoj kev sawv rov los.