COV NEEG UA HAUJ LWM KHO MOB NQA TSHUAJ TIV THAIV COVID-19 RAU COV NEEG MOB NYOB HAUV TXAJ

Fis Lis Pees teb tab tom tawm tsam ib tus kab mob Covid-19 uas yog tus kab mob phem tshaj plaws nyob rau sab As Xias. Mas Nis Las yog ib lub tuam ceeb uas muaj 16 lub nroog thiab 13 plhom tus neeg nyob. Ces thiaj ua rau neeg kis tus kab mob Covid-19 coob tshaj lwm cov xeev.
Hauv lub nroog Marikina uas nyob sab hnub tuaj nruab nrab ntawm lub tuam ceeb Mas Nis Las, cov pej xeem ib txhia tsis tuaj yeem mus tau hauv tsev kho mob, tab sis lawv tuaj yeem sau npe nkaug tshuaj Vaccine. Ederlina Barriada Paraiso uas nws muaj hnub nyoog 81 xyoos, nws hais tias luag tej ntshai nkaug tshuaj tiv thaiv kab mob, tab sis kuv tsis ntshai thiab kuv xav nkaug tshuaj. Cov lus no yog nws hais tom qab nws nkaug hom tshuaj Vaccine Sinovac Biotech uas tsim nyob Suav teb. 
Kev nkaug tshuaj Vaccine tiv thaiv nyob Fis Lis Pees teb, txhua yam qeeb dua ntau lub teb chaws uas nyob sib ze thiab ua teeb meem rau coob leej tsis kam nkaug Vaccine. 
Kev tshawb fawb ntawm Pulse Asia nyob rau lub 2 hlis thiab lub 3 hlis, pom tias nyob hauv 10 tus pej xeem, mas muaj 6 leej tsis kam nkaug tshuaj, vim lawv txhawj xeeb txog kev nyab xeeb ntawm lawv lub cev. 
Pab kws kho mob hauv nroog Marikina lub hom phiaj xav kom txhaj tshuaj coob dua 520 leej rov saud, tam sim no lees tias cov neeg sau npe nkaug tshuaj tseem tsawg heev. Marian Magno uas nws yog ib tug kws kho mob nyob hauv nroog Marikina hais tias cov neeg tsis muaj zog txaus txhaj tshuaj tiv thaiv, yog qhov tseem ceeb rau lawv txoj kev noj qab nyob zoo. Yog tiv thaiv lawv lub cev nyob hauv cov tsev neeg txuas ntxiv rau ntau tiam neeg. Nod yog qhov uas lawv tsis kam tawm hauv tsev mus sab nraud, tab sis lwm cov neeg nyob ib pluag ncig nkag thiab tawm mus hauv tej nroog.