BRUNO‘S COFFEE: YOG TUS NTXHIAB NTAWM KEV KOOM UA IB LUB SIAB

Cov tub tshaj Ntuj Lus Fidei Donum uas tuaj ntawm Is Tas Lias teb tuaj, lawv nyob hauv lub tsev teev Ntuj Mary Queen Of Peace, hauv lub nroog Cej Hoom, xeev Lampang nyob Thaib yav qaum teb. Lawv tau qhib ib txoj kev sib koom cog thiab muag kob swm tshuaj, kom tau nyiaj los pab cov me nyuam kawm ntawv. 
Kev qhia tsoom pej xeem cog kob swm tshuaj, mas yog ib txoj kev pab txhim kho tsoom pej xeem lub neej. Lawv tau pib hais txog kev cog kob swm tshuaj los tau 10 tawm xyoo lawm. Kev tshaj Ntuj Lus thiab kev ua hauj lwm nyob hauv lub nroog Cej Hoom, yog ua raws Vaj Qhia Fas Ntshis Kus lub hom phiaj nyob hauv Encyclical Laudato Si.
Cov hauj lwm no yog zwm rau lub Cheeb Koom Txoos Chiangmai, thiab pib ua nyob hauv lub nroog Cej Hoom kom tau ua kev sib koom tes nrog cov tub tshaj Ntuj Lus nyob hauv lub Cheeb Koom Txoos Triveneto uas yog Is Tas Lias qaum teb. Pib txhim tsa thaum lub 4 hlis xyoo 1990, ces lub rooj sab laj xyoo 1997 thiaj muaj 2 tug Txiv Plig tuaj ntawm Fidei Donum tuaj nyob Cej Hoom. Lub hom phiaj ntawm lub tsev teev Ntuj Mary Queen Of Peace yog xav txhawb nqa tsoom tub ntxhais nyob hauv zej zog txoj kev kawm ntawv, ces lawv thiaj ua 4 lub tsev kawm ntawv rau cov me nyuam tau kawm txuj. Muaj cov me nyuam ntau pua leej tuaj ntawm 40 tawm lub zos thiab 7 haiv neeg tsawg tuaj kawm ntawv nyob haud. 
Xyoo 2019 lub nroog Chiangmai yog lub nroog uas huab cua thiab iab oo phem tshaj plaws, cov teeb meem yog los ntawm kev hlawv teb thiab hlawv tej yam toob xib tsis siv pov tseg. Vim li ntawd, cov tub tshaj Ntuj Lus thiaj tawm tswv yim los cog kob swm tshuaj Bruno Rossi, ces thiaj pib li ntawd los tau 10 tawm xyoo lawm. Txoj hauj lwm no yog uas los pab txhawb nqa tseem hwv txoj kev txhawb nqa tsoom pej xeem thiab tsis yog tsim los ua lag luam kom nplua nuj raws li Vaj Qhia cov lus hais nyob hauv Laudato Si.