LEEJ NTUJ PLIG NTSHIAB UA KOM PEB MUJ LUB SIAB TAWV, MUAJ KEV VAM KHOM THIAB MUAJ KEV TSO SIAB

Vaj Qhia Fas Ntshis Kus rov xav txog Leej Ntuj Plig Ntshiab txoj hauj lwm thiab Vaj Qhia thov kom sawv daws qhib siab txais Leej Ntuj Plig lub txiaj ntsim thiab tawm mus ua tim khawv txog Tswv Ntuj txoj kev nyiam.
Hnub tim 23 lub 5 hlis 2021 no yog Hnub Chiv Tsib Caug, Vaj Qhia thov kom tsoom ntseeg sawv daws qhib siab txais Leej Ntuj Plig lub txiaj ntsim thiab ua siab tawv, muaj kev vam khom thiab tso siab rhais ruam tawm mus ua tim khawv txog Huab Tais Yes Xus txoj ke nyiam.
Vaj Qhia hais txog cov lus hauv Ntawv Hauj Lwm tias thaum Huab Tais Yes Xus yuav mus saum Ntuj mas nws hais rau lawv kom lawv txhob tawm hauv Yes Lus Xas Les mus qhov twg txog hnub Leej Ntuj Plig Ntshiab yuav nqes los. 
Ces txog Hnub Tsib Caug, Yes Xus cov thwj tim sib sau ua ke nyob hauv kem tsev, niam Mab Liab nrog lawv nyob ua ke ntawd. Lawv hnov ib lub suab nrov saum ntuj tuaj xws li ib nthwv cua tshuab los hauv kem tsev uas lawv nyob.
Vaj Qhia nthuav tias zaj no qhia tias Leej Ntuj Plig Ntshiab zoo puav tam li cua: muaj zog thiab twj lij. Tsis muaj leej twg tuav tau, cua tshuab mus feem twg los tsis muaj leej twg yuav paub tau.
Neeg tsis nkag siab thiab tsis to taub txog Leej Ntuj Plig Ntshiab, peb tsuas paub tias Leej Ntuj Plig Ntshiab los ntawm Leej Txiv thiab Leej Tub los thiab los nyob saum lub Koom Txoos uas yog cov ntseeg sawv daws, Leej Ntuj Plig Ntshiab pub txoj sia rau peb lub siab thiab lub plawv. Raws li lo lus tias “Leej Ntuj Plig Ntshiab yog tus Huab Tais pub txoj sia.”
Vaj Qhia hais tias thaum ntawd, Yes Xus cov thwj tim ntshai thiab tsis muaj cuab kav tawm mus sab nraud. Yog muab xav rau peb ces muaj ntau zaus peb kuj xav nyob hauv lub tsev muaj ntsa zeb thaiv khov kho. Tiam sis Huab Tais paub tias yuav nkag los nrhiav peb tau li cas thiab yuav qhib peb lub siab tau li cas. Huab Tais thiaj xa Leej Ntuj Plig Ntshiab tuaj qhwv peb siab, tuaj pab peb ntaus kom yeej lub siab ua xyem xyav, rhuav tej ntsa zeb tiv thauv peb pov tseg. Leej Ntuj Plig Ntshiab tsim txoj sia tshiab nyob hauv peb ib yam li nws tau pub rau cov thwj tim nyob hauv hnub ntawd.
Thaum cov thwj tim tau txais Leej Ntuj Plig Ntshiab los nyob hauv lawv tas, lawv tsis zoo li tus neeg qub lawm. Cov thwj tim pib tawm mus tshaj txog Yes Xus kev sawv rov los thiab tshaj txog Yes Xus kev ua Huab Tais raws li lawv nkag siab thiab raws lawv xeem lus rau lwm tus mloog.
Vaj Qhia hais ntxiv tias Leej Ntuj Plig Ntshiab hloov cov thwj tim lub siab thiab nthuav lawv lub siab kom dav tuaj ua rau lawv zoo siab qhia txog Tswv Ntuj tes dej num cawm neeg pub rau lwm tus raws li lawv lub tswv yim thiab lawv kev ua neej.
Leej Ntuj Plig Ntshiab ua rau sawv daws sib txawv nyob hauv tib lub Koom Txoos. 
Vaj Qhia thov kom cov ntseeg sawv daws qhib siab txais Leej Ntuj Plig lub txiaj ntsim los nyob hauv lawv, los qhia sawv daws kom pom Tswv Ntuj txoj kev nyiam qhov zoo nkauj thiab qhov tseeb nyob hauv Yes Xus Pleev txoj kev tuag thiab sawv rov los, kom sawv daws muaj cuab kav tawm mus ua tim khawv txog txoj kev nyiam no nyob hauv Tswv Ntuj kev khuv leej neeg.
“Ntiaj teb vam txog Leej Pleev cov thwj tim uas muaj ib lub siab tawv, muaj kev vam khom, thiab tso siab. Ntiaj teb xav kom cov ntseeg ua ib co poov xab, ua ntsev thiab ua lub teeb ci nyob hauv tej xwv txheej txawv sij hawm, txawv caij nyoog, txawv kab lis kev cai, txawv txuj ci thiab txawv npoj txawv neeg no. Tsuas muaj Leej Ntuj Plig tib tug xwb thiab ua tau.”