NTHUAV NTAWV MOO ZOO HNUB TIM 26/11/2019

Lub Tuam Tsev Teev Ntuj yuav raug xwv txheej.

5 Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj paj tshab txi Ntuj zoo saib. Yes Xus hais tias : 6 "Tej uas nej qhov muag ntsia ntawm no, muaj ib hnub luag yuav rhuav tsis tseg ob lub pob zeb txhim sib tshooj sawv ntsug." 7 Lawv nug Yes Xus tias : "Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi thaum tej ntawd yuav tshwm sim tuaj ?”

8 Yes Xus hais tias : "Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : 'Yog kuv', thiab yuav hais tias : 'Lub zim txwv twb los txog ze ze lawm'. Mas nej txhob mus raws lawv. 9 Thaum nej hnov luag tham txog kev tsov rog thiab kev kub ntxhov, mas nej tsis txhob ntshai. Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd." 10 Yes Xus hais rau lawv tias : "Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. 11 Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev tshaib. Yuav muaj tej yam xwm txaus ntshai kawg, thiab tej lub cim loj nyob saum ntuj.

Kwv tij sawv daws, nyob rau hauv zaj no cov Thwj Tim nug Yes Xus tias, cov xwm txheej ntawd yuav tshwm sim tuaj thaum twg thiab yuav muaj lub cim dab tsi uas yuav qhia tau tias tej uas Yes Xus hais ntawd yuav tshwm sim tuaj yog thaum twg. 

Huab Tais Yes Xus kuj tsis hais tias yog thaum twg, tab sis, Huab Tais Yes Xus hais tias, kom lawv ceev faj, vim tej xwm txheej yuav tshwm sim tuaj thaum twg, lub sib hawm twg tsis muaj leej twg paub. Huab Tais Yes Xus hais tias : “Txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias ; ‘Yog kuv’, thiab yuav hais tias ; ‘Lub zim txwv twb los txog ze ze lawm.’ Mas nej txhob caum lawm. 

Cov neeg ntseeg ntuj thawj thawj tiam, nyob rau lub caij tom qab Huab Tais Yes Xus mus saum Ntuj lawm. Muaj cov yaj saub cuav thiab xib hwb cuav tuaj qhia tsis raws li Huab Tais Yes Xus qhia coob kawg. Tus Hauv Paus Xa Lus Paj Lug kuj ntuas cov ntseeg tias kom sawv daws ceev faj. Vim cov ntawd yog cov hma uas tuaj ua kom Tswv Ntuj pab yaj tawg. Tej ntawd tshwm sim tuaj ua ntu zus, tab sis txawm yuav tshwm sim tuaj lub caij twg kuj xij tsis tseem ceeb, qhov tseem ceeb yog peb yuav tsum tswj peb txoj kev ntseeg kom ruaj khov, peb yuav tsum ntseeg thiab tso siab rau Huab Tais Yes Xus. thiab peb yuav tsum cim kom tau Huab Tais Yes Xus cov lus qhia kom meej meej, peb nco ntsoov thiab khaws coj mus siv nyob rau hauv peb lub neej mus kom txog hnub kawg. Tab yog txhuav tsav txhua yam hauv peb lub neej yuav dhau mus thiab peb txoj sia yuav ploj hauv lub ntiaj teb, tab sis, Tswv Ntuj cov lus qhia yuav tsis ploj, tseem yuav nyob nrog tib neeg mus txhua txhia tiam neeg, mus kom txog hnub ntiaj teb kawg.

Tus sau : XH. Xyooj Tuam Lis, Zoo Tswv Zov Yaj