NTAWV NTSHIAB HAUV HNUB TIM 21 LUB 6 HLIS 2021

HNUB OB, LIS PIAM 12 CAIJ NRUAB XYOOS (XYOO TAB)

PHAU NTAWV HAUV PAUS (HP12:1-9)

HUAB TAIS hais rau Has Nplas tias "Tso koj lub teb chaws tseg, tso koj tsev neeg, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj. Kuv yuav tsa koj ua ib haiv neeg loj, kuv yuav foom hmoov zoo rau koj, thiab kuv yuav ua kom koj lub npe nto moo loj. Koj yuav nqa txoj hmoov zoo rau txhua leej txhua tus. Kuv yuav foom hmoov zoo rau cov neeg uas foom hmoov zoo rau koj, kuv yuav foom hmoov phem rau cov uas foom phem rau koj. Tas txhua haiv neeg nyob ntiaj teb yuav muab koj lub npe los sib foom hmoov zoo.”

Has Nplas sawv kev mus raws li HUAB TAIS kom nws mus. Los kuj nrog nws mus thiab. Thaum Has Nplas tsiv hauv Has Laas teb mus, nws muaj xya caum tsib xyoos. Has Nplas coj nws poj niam Xas Lais, thiab nws tus kwv tus tub hu ua Los nrog nws mus. Nws sau tas nws lub cuab tam uas nws tau tsim, thiab tas nws cov tub txib tub txuas uas nws tau muas los nyob Has Laas nrog nws mus. Lawv sawv kev mus, ces lawv tuaj txog lub teb chaws Kas Nas Has. Has Nplas hla ntau lub teb chaws, nws thiaj mus txog thaj chaw ntshiab hu ua Xis Kes, ntawm qhov chaw uas muaj tus ntoo Ntseej nyob Mos Les. Thaum ntawd, cov neeg Kas Nas Has nyob hauv lub teb chaws. HUAB TAIS tawm los rau Has Nplas pom, HUAB TAIS hais rau nws tias "Kuv yuav muab lub teb chaws no rau koj tsoom xeeb ntxwv nyob."

Ces Has Nplas txhim ib lub thaj txi HUAB TAIS nyob ntawd, vim HUAB TAIS tawm los rau nws pom nyob ntawd. Has Nplas hla mus rau pem roob, nyob ntawm Npes Thes sab hnub tuaj. Nws tsa nws lub tsev tsam phooj rau ntawd, Npes Thes nyob sab hnub poob, hos Ais nyob sab hnub tuaj. Nyob ntawd nws kuj tsa ib lub thaj txi HUAB TAIS thiab teev HUAB TAIS lub npe. Ces Has Nplas maj mam tsiv ib thaj chaw dhau ib thaj, mus txog lub teb chaws Nes Zes.

MAS TAIS NTAWV MOO ZOO (MT7:1-5)

Yes Xus hais tias "Nej txhob txiav txim, Ntuj thiaj yuav tsis txiav txim rau nej; vim tias, nej txiav txim li cas rau luag, Ntuj yuav txiav txim ib yam li ntawd rau nej. Nej luj li cas rau luag, Ntuj kuj yuav luj li ntawd rau nej.

Ua cas koj ntsia tus quav nplej nyob hauv koj tus kwv qhov muag? Tab sis tus nqaj tse nyob hauv koj qhov muag, koj ho tsis pom! Koj tseem hais rau koj tus kwv tias cia kuv rho tus quav nplej hauv koj qhov muag pov tseg," tab sis ib tug nqaj twb nyob hauv koj qhov muag!

Neeg zoo sab nraud, koj xub rho tus nqaj hauv koj qhov muag tso, koj thiaj li pom kev rho tus quav nplej hauv koj tus kwv qhov muag.”