Lub cail nruab xyoo

Hnub Chiv Tim 6 Lub 6 Hlis

Lub cail nruab xyoo

Mas Kos 4:25-41

Hauv lub Moo Zoo hnub no muaj ob peb lub cim uas qhia txog peb txoj kev ntseeg. Peb zoo li Yes Xus cov thwj tim uas muaj kev ntseeg thiab nrog Yes Xus nqes mus hauv lub nkoj. Thaum mus nyob hauv lub nkoj lawm, kuj muaj lub hom phiaj zoo ib yam, muaj txoj kev ntseeg zoo ib yam. Lub nkoj yog ib tug qauv txog Yes Xus lub Koom Txoos. Lub Koom Txoos Catholic thiaj li zoo li ib lub nkoj tab tom taug kev mus cuag txoj sia nyob mus li ntawm Tswv Ntuj lub xub ntiag.

Tab sis taug txoj kev no tsis yooj yim, yuav ntsib teeb meem, yuav ntsib nthwv cua nag xob nag cua, muaj dej nphau tej niag twv los ntsawj lub nkoj ua rau peb ntshai tsis tso siab, tsis muaj kev cia siab hauv txoj kev ntseeg hauv txoj kev taug no. Thaum muaj teeb meem li no, qees leej txiav txim siab tig rov qab. Qees leej ua xyem xyav, tsis paub yuav ua li cas. Ntau zaus nyob hauv peb lub neej zoo li no. Ib yam li cov thwj tim hauv lub nkoj, peb ntshai peb quaj, peb hu txog Tswv Ntuj thiab nug tias “Tswv Ntuj peb yuab tuag ua cas koj tsis tiam faj? Ua cas koj tseem tsaug zog! Tsis teb ib lo lus. Ua cas koj tso tej xwm txheej no tshwm sim rau peb los rau hauv peb lub neej.

Kuv xav qhia rau nej sawv daws tias cov lus nug no yuav tsis dhau mus ntawm peb vim tias qhov no yog txoj kev tseeb nyob hauv peb lub neej. Yam no yog ib feem nyob hauv peb txoj sia. Cov teeb meem no yuav ploj mus thaum tas peb txoj sia. Thov peb mloog lo lus Yes Xus hais rau cov thwj tim “Ua cas nej ntshai na luaj?” ntshai ruj rwg? Yes Xus tsis hais rau nthwv cua xwb thiab nws hais rau peb sawv daws tias “Tswm seeb! Koj ua twj ywm” Qhov no tseem ceeb tshaj. Tsis yog nthwv cua tshuab uas txaus ntshai tam sis yog nthwv cua hauv peb lub siab ua au peb tsis muaj kev ntsiag to. Yes Xus ib leej xwb yog tus ua kom nthwv cua hauv peb lub siab tu nrho, ua kom peb muaj ntsiag to, muaj kev nkag siab, muaj kev ntseeg Ntuj nruaj nres.

Vim li no, thov nej sawv daws tso siab nyob hauv Yes Xus kom nruaj nres. Txhob ua xyem xyab. Thov nej sawv daws muaj kev ntsiag to, kev thaj yeeb hauv yus lub siab lub ntsws.