NTHUAV NTAWV MOO ZOO HNUB TIM 28/11/2019

LK 21 : 20-28

Yes Lus Xas Les yuav raug xwv txheej.

 20 "Thaum nej pom tej pab tub rog tuaj vij Yes Lus Xas Les, mas nej yuav to taub tias kev rhuav Yes Lus Xas Les nyob ze lawm. 21 Thaum ntawd mas, cov nyob hauv xeev Yus Das kav tsij cia li khiav mus pem roob, cov nyob hauv nroog yuav tsum khiav tawm mus deb, hos cov uas nyob tom tej teb txhob mus hauv nroog. 22 Vim yog lub caij rob caub, txhua tsav txhua yam uas sau tseg lawd yuav tsum tshwm sim tuaj. 23 Lub caij ntawd, cov poj niam uas cev tsis tab seeb thiab cov uas muaj me nyuam mos noj mis yuav raug txom nyem loj. Vim tias yuav muaj kev txhawj ntshai loj nyob ntiaj teb, thiab yuav muaj kev npau taws loj rau haiv neeg no. 24 Lawv yuav ntog hauv hniav ntaj ntse. Luag yuav ntes lawv mus nyob txim rau tom luag tsoom kuj cuab, ces lwm cov haiv neeg yuav tsuj Yes Lus Xas Les mus txog hnub lawv lub zim txwv dua."

25 "Yuav muaj ib co cim nyob saum lub hnub, lub hli thiab cov hnub qub. Nyob ntiaj teb no, ib tsoom haiv neeg yuav raug kev txhawj xeeb loj. Dej ntuj yuav nphau ua suab nrov nroo ntws, ces cov haiv neeg yuav txhawj. 26 Neeg yuav tuag ntshai, vim sawv daws txhawj kawg txog tej yam yuav tuaj raug lub qab ntuj neeg ; vim tej yam muaj hwj huam nyob txheej ntuj saud yuav co ua zog koog. 27 Thaum ntawd, sawv daws yuav pom Neeg Leej Tub muaj hwj huam thiab muaj koob meej loj kawg, los hauv ib tw huab los. 28 Thaum tej ntawd pib tshwm sim tuaj, mas nej yuav sawv, nej yuav tsa taub hau, vim txoj kev txhiv nej los txog ze lawm."

Kwv tij sawv daws, nyob rau hauv zaj no Huab Tais Yes Xus hais txog lub zim txwg kawg. 

Thawj nqe lus yog hais txog lub zim kawg ntawm haiv His Xas Lais, lub caij nroog Yes Lus Xas Les, lub Tuam tsev teev Ntuj loj thiab ib puas tsav yam hauv haiv His Xais Lais raug luag lwm haiv neeg tuaj ntaus tawg thiab tsoo puas ntsoog tas, haiv neeg His Xas Lais tawg ua sab ua sua. 

Hos nqe ob yog hais txog lub caij ntiaj teb kawg. Txhua txhiam yam yeej tau tshwm sij tuaj raws nkaus li Huab Tais Yes Xus tau hais tseg tiag, nyob rau xyoo 70 cov Los Mas tuaj vij lub nroog Yes Lus Xas Les, lawv tsoo thiab hlawv ib puas tsav yam puas tsuaj tas, cov neeg raug tua tuag thiab tawg ua sab ua sua, raug ntes mus ua qheev coob kawg.

Cov phooj ywg, yog peb nyeem txog tej nqe lus no, mas yeej ua rau peb poob siab me ntsis, tab sis, txawm li cas los xij, thov kom peb muaj kev ntseeg thiab tso siab rau Ntuj, tso siab rau peb tus Huab Tais Yes Xus pleev, ces peb yuav ua tau siab loj, vim Tswv Ntuj yuav pab tiv thaiv peb thiab txuag peb zoo yam li thaum ub nws tau pab thiab txuag tus Yaj Saub Das Nias, uas nws muaj txoj kev ntseeg ruaj txog Tswv Ntuj. Yog tias peb muaj txoj kev ntseeg, mas tab yog peb txoj sia nyob ntiaj teb no yuav ploj, tiam sis, peb yuav txuag tau txoj sia nyob hauv Tswv Ntuj lub Ceeb Tsheej mus li.

Peb tsis txhob qab siab ua neej dhau, niaj hnub nrhiav nyiaj thiab kov xov tooj, thiab kov tej yam tsis tseem ceeb, nyob tsam peb tsis nco ceev faj, ces txhua yam yuav lig dhau rau peb nawb mog

Tus sau : XH. Xyooj Tuam Lis, Zoo Tswv Zov Yaj