NTAWV NTSHIAB HAUV HNUB TIM 29 LUB 6 HLIS 2021

HWM LEEJ NTSHIAB POB ZEB THIAB LEEJ NTSHIAB PAJ LUG

HNUB PEB, LIS PIAM 13 CAIJ NRUAB XYOOS (XYOO TAB)

PHAU NTAWV HAUJ LWM (HL12:1-11)

Ze lub sij hawm ntawd, mas Hes Los ntes ob peb tug neeg nyob hauv lub Koom Txoos. Nws xav hiam lawv. Nws xuas ntaj txiav Zam tus tij laug Yas Kos taub hau. Hes Los pom tias cov Yus Das zoo siab rau qhov nws ua, ces nws tso neeg mus ntes Pob Zeb thiab. Hnub ntawd yog hnub noj cov ncuav mov tsis muaj poov xab.

Hes Los ntes tau Pob Zeb lawm, nws muab Pob Zeb kaw hauv tsev loj faj. Hes Los kom plaub pab tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho, mas nws yuav kom Pob Zeb tawm los rau ntawm tsoom pej xeem xub ntiag.

Thaum luag muab Pob Zeb kaw hauv tsev loj faj, mas lub Koom Txoos thov Tswv Ntuj tsis tseg rau Pob Zeb.

Txog hnub Hes Los yuav txiav txim rau Pob Zeb, hmo ntawd Pob Zeb tsaug zog nyob nruab nrab ob tug tub rog, ib txog hlua khi rawv nws rau ntawm ob tug tub rog, hos tseem muaj ib co zov qhov rooj nyob sab nraud thiab. Ib sij huam, Huab Tais tus Tshiab tawm los ua kem tsev pom kev lug. Tus Tshiab tuav Pob Zeb, tsa nws sawv, hais rau nws tias "Koj sawv tsees Tam sim no!"

Cov hlua khi Pob Zeb ob txhais tes cia li plam plaws. Tus Tshiab hais ntxiv tias "Muab koj txoj siv sia thiab rau koj nkawm khau!"

Pob Zeb sia zoj siv, rau zoj khau tas. Tus Tshiab tseem hais tias "Muab koj lub tsho ntev pov saum koj xub pwg tso, koj lawv kuv qab!"

Ces Pob Zeb lawv tus Tshiab qab tawm mus. Pob Zeb tsis paub meej tias puas yog tiag, nws xav tias yog nws ua yog toog pom ib tug Tshiab xwb.  Nkawd hla thawj pab zov keeb, thiab tseem mus dhau ib pab ntxiv, nkawd thiaj txog lub qhov rooj hlau uas yuav tawm rau sab nroog nraud. Lub qhov rooj hlau cia li qhib plho rau nkawd. Nkawd tawm plaws mus txog ntawm ib txog kev, ces tus Tshiab cia li ploj ntais lawm.

Pob Zeb thiaj tsim dheev, nws hais tias "Zaum no, kuv paub tseeb tias Huab Tais xa nws tus Tshiab tuaj pab kuv kom kuv dim ntawm Hes Los thiab kom cov Yus Das txhob tau pom raws li lawv vam."

COV LUS HAUV TSAB NTAWV PAJ LUG SAU TXOG TIS MOS TES, TSAB OB (2TMT4:6-8,17)

Ntawm kuv, mas txog lub caij hliv kuv roj ntsha los txi Ntuj lawm. Txog lub caij kuv yuav mus. Tas kuv sid, kuv tau ua ib ntsug zoo rog. Kuv khiav mus txog chaw lawm. Kuv tau ceev txoj kev ntseeg.

Nyem no, Huab Tais twb npaj tau lub kaus mom yeej phim cov neeg ncaj rau kuv lawm. Lub zim txwv kawg, tus Huab Tais txiav txim ncaj yuav muab lub kaus mom ntawd rau kuv. Tsis yog yuav muab rau kuv ib leeg xwb: nws yuav muab rau tas tsoom neeg nyiam nws, thiab rau tas tsoom neeg tos lub Hnub Nyoog nws yuav tawm los rau pom xyeem.

Huab Tais tau nrog nraim kuv. Nws tso nws lub zog rau hauv kuv, kom kuv tshaj lub Moo, kom lub Moo nrov mus txog cov neeg teev pej kum dab pob ntseg. Ntuj npo kuv dim ntawm tsov ntxhuav lub ncauj.

Huab Tais yuav npo kuv dim ntawm txhua hom kev nkhaus. Huab Tais yuav cawm kuv. Nws yuav txuag kuv rau nws lub Ceeb Tsheej nyob saum Ntuj. Huab Tais nto koob meej mus ib txhiab ib txhis. Ua li.

MAS TAIS NTAWV MOO ZOO (MT16:13-19)

Yes Xus tuaj txog cheeb tsam ntawm Xes Ntxas Les Fis Lis Pos, ces nws nug cov thwj tim li no "Luag tej hais tias Neeg Leej Tub yog leej twg?"

Lawv teb tias “Ib txhia hais tias yog Zam Ntxuav Plig. Ib txhia hais tias, yog Es Lias. Tseem muaj lwm cov hais tias yog Yes Les Mias los yog ib tug hauv cov yaj saub.”

Yes Xus hais tias "Nej ne, nej hais tias kuv yog leej twg?"

Xis Moos Pob Zeb teb tias "Koj yog Leej Pleev, yog tus Tswv Ntuj Muaj Txoj Sia Leej Tub."

Yes Xus teb rau Pob Zeb tias "Xis Moos, Yos Nas tus tub, koj txoj hmoov zoo, vim qhov koj paub no, tsis yog nqaij thiab ntshav qhia koj. Yog kuv Txiv nyob saum ntuj qhia koj.

Ua li mas kuv hais rau koj: Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis taus lub pob zeb no.

Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."