COV ME NYUAM NTXHAIS XIS LAAS KAS RAUG QUAB YAM UA NIAM NTIAV

(Asianews photo)

Friday, June 25, 2021

Raws kev soj ntsuam ntawm cov tub zog hla teb chaws ILO, mas pom tias muaj cov me nyuam tub ntxhais hluas 103,704 leeg ua hauj lwm nyob Xis Laas Kas teb. Nyob hauv 10 xyoo dhau los, mas tus zauv ntawm cov me nyuam tub ntxhais hluas ua hauj lwm muaj ze ib nrab plhom leej. Niaj hnub no muaj cov me nyuam tub ntxhais hluas raug ntes li ntawm 39,007 leej uas yog lawv ua cov hauj lwm tsis dawb huv.

Tab txawm tias 2-3 xyoos dhau los no tus zauv nqis tsawg me ntsis lawm, tsis kav cov me nyuam tub ntxhais hluas Xis Laas Kas kuj tawm tsis kawm ntawv coob kawg, vim yog lawv tsev neeg txom nyem. Thiaj ua rau cov neeg liaj neeg teb tej tub tej ntxhais tsis tau txais kev kawm, feem ntau yog cov me nyuam ntxhais. Ces cov me nyuam hluas kawg mus ua dag ua zog nyob hauv lwm tus tej teb tshuaj yej, tsis kav lawv raug txo nqi zog thiab tus nqi zog qis heev.

Ib qho kuj yog los ntawm cov neeg ncig tsham teb chaws, ua rau lawv tau zoo nrhiav cov me nyuam ntxhais mus ua niam ntiav nrog lawv pw. Tsaib no tseem hwv Xis Laas Kas kho txoj cai kheev cov neeg ua zog hnub nyoog 14 txog 16 xyoo. Yog tseem hwv daws kho txoj cai lawm, mas cov me tub me ntxhais hnub nyoog 14 txog 16 tuaj yeej mus ua hauj lwm ua zog tau.

Vaj Qhia Fas Ntshis Kus tau hais tias kev siv tej me tub me ntxhais ua hauj lwm, mas yog ib yam uas yuav tau xyuam xim thiab xav kom zoo.

ILO hais tias cov me nyuam tub ntxhais hluas uas raug yuam nyob hauv txoj kev ua hauj lwm tam sim no muaj 160 plhom leej nyob hauv 4 xyoos dhau los. Cov me nyuam li hais no ib feem muaj hnub nyoog li ntawm 5 txog 11 xyoos.