NTHUAV NTAWV MOO ZOO HNUB TIM 30/11/2019

MT 4 : 18-22

Hu thawj plaub leeg thwj tim.

 18 Yes Xus mus ko taw taug ntug dej ntuj Nkas Lis Lais, nws pom ob kwv tij : Xis Moos uas hu ua Pob Zeb, thiab nws tus kwv As Nres. Nkawd tseem tab tom pov vas ntses rau hauv dej ntuj, vim nkawd yog tub puav ntses. 19 Yes Xus hais rau nkawd tias : "Neb raws kuv mus, kuv yuav tsa neb ua tub puav neeg." 20 Nkawd tso plhuav cov vas ntses tam sis ntawd, nkawd raws Yes Xus mus. 21 Yes Xus mus ntxiv, nws ho pom ob kwv tij ntxiv : Yas Kos, uas yog Ntxes Npes Dais tus tub, thiab Zam uas yog Yas Kos tus kwv, nkawd nrog nkawd txiv Ntxes Npes Dais nyob hauv nkoj, lawv tseem tab tom ntxiv lawv cov vas ntses. Yes Xus hu nkawd. 22 Tam sis ntawd, nkawd tso plhuav lub nkoj thiab nkawd txiv tseg, nkawd raws Yes Xus mus.

Kwv tij sawv daws, nyob rau hauv zaj hnub no yog lub Koom Txoos cia peb hwm txog Leej Ntshiab As Nres uas yog ib tug hauv Yes Xus pab Thwj Tim 12 leeg.

Nyob rau hauv zaj nyeem hnub no kuj piav txog lub caij Huab Tais Yes Xus tuaj mus rau ntawm sab ntug dej ntuj Nkas Lis Lais thiab nws tau ntsib tej tug tub hluas, ces nws hu lawv los ua nws Thwj Tim.

Nyob hauv zaj no kuj muaj ib nqe lus tseem ceeb zoo rau peb khaws coj mus xav. Yog nqe lus tias : “Txooj kev ntseeg yog los ntawm tus txawj mloog.” Yog vim nws mloog Huab Tais Yes Xus lub suab ces hnub no nws thiaj los raws Huab Tais Yes Xus thiab ua Yes Xus Thwj Tim.

Yam li Leej Ntshiab Pob Zeb, thaum nws ntsib Huab Tais Yes Xus. Huab Tais Yes Xus hu nws, ces nws mloog Huab Tais lub suab, thiab nws tso ib puas tsav yam tseg thiab raws Yes Xus mus.

Ua rau nws lub neej hloov mus txhua yam. Ib tug neeg me me, yog tub puav ntses, nrhiav hnub noj hnub, lub neej tsis paub tom hauv ntej, tab sis hnub no, nws los raws Yes Xus thwj tim, ua rau nws lub neej hloov mus. Nws tau los ua ib tug coj hauv lub Koom Txoos. Nws tau txais lub hwj chim los ua thawj tug Vaj Qhia, uas rau lub qab ntuj neeg sawv daws, cav txog nws lub koob npe mus tsis muaj caij kawg. 

Kwv tij phooj ywg sawv daws, Huab Tais Yes Xus tuaj hu peb sawv daws los ua nws thwj tim, tiam sis, qee zaus peb pos pob ntseg, peb kaw peb lub siab, ces peb tsis xav hnov nws tej lus, peb tsis mloog nws lub suab hu, ces ua rau peb nrhiav tsis tau txoj kev dim. Muaj qee tus tau hnov, tiam sis, nws tsuas ntseeg hauv lub siab xwb, nws tsis kam hais tawm ntawm lub ncauj, nws tsis kam ua Tswv Ntuj tej dej num, ces Tswv Ntuj kuj cawm tsis tau nws.

Tus sau : XH. Xyooj Tuam Lis, Zoo Tswv Zov Yaj