YES XUS KHO PEB LUB SIAB

Hnub Chiv hauv Lis Piam 13 Caij Nruab Xyoos no Vaj Qhia Fas Ntshis Kus piav tias Huab Tais Yes Xus tau hla dhau kev txhaum thiab neeg lub siab nqaim xav txog tej yam hauj lwm tsis zoo dhau los.

Tim 27 lub 6 hli no mas Vaj Qhia Fas Ntshis Kus rov nthuav Ntawv Moo Zoo rau tsoom ntseeg hauv tshav puam hwm Leej Ntshiab Pob Zeb, hauv Vas Tis Kas dua, hnub no yog cov lus hauv Mas Kos Ntawv Moo Zoo (MK5:25-34) yog hais txog Huab Tais Yes Xus kho tus poj niam tsob ntshav tau kaum ob xyoos los lawm, thiab piav txog Huab Tais Yes Xus tsa Yais Los tus ntxhais tuag sawv rov los.

Vaj Qhia hais tias hnub no mas Huab Tais Yes Xus tau tim ntsej tim muag nrog txoj kev mob nkeeg thiab kev tuag. Huab Tais Yes Xus muab nws tus kheej los nphav peb tej kev txom nyem thiab kev tuag. Huab Tais Yes Xus ua 2 lub cim qhia rau peb tias kev txom nyem thiab kev tuag tsis yog ob lo lus kawg nyob hauv peb txoj sia.

Nyob hauv lub caij kab mob sib kis tas qhov txhia chaw li no mas peb saib kev mob nkees yog ib yam loj zoo xws li Ntawv Moo Zoo hais xog Huab Tais Yes Xus lub hwj chim kho tus poj niam tsob ntshav.

Peb pom tias tus poj niam xav hauv nruab siab tias nws yog ib tug neeg tsis huv, mas nws thiaj tsob ntshav los tau 12 lub xyoos thiab tsis muaj tus kws tshuaj twg yuav kho tau nws.

Tej zaum nws yuav raug nws tsev neeg los yog nws tus txiv tso nws pov tseg, kom nws nyob tib leeg, tsis muaj leej twg saib xyuas thiab tu nws. Nws nyob twm zeej nrog lub siab txom nyem cuag li ib rab riam tab tom hlais nws nplooj siab tsis tseg.

Vaj Qhia thiaj hais rau sawv daws tias “Kev mob nkees loj tshaj hauv peb txoj sia mas yog tsis muaj tus twg nyiam peb thiab peb tsis muaj peev xwm nyiam tau lwm tus.”

Ntawv Moo Zoo piav ntxiv tias tus poj niam tsob ntshav muab tag nrho nws lub cuab tam nyiaj txiag los nrhiav tshuaj kho nws, tsis kav nws txom nyem dua qub.

Vaj Qhia muab piv rau peb sawv daws tias nyob hauv peb lub neej los peb kuj niaj hnub nrhiav hau kev kom lwm tus nyiam peb xws li nrhiav nyiaj txiag kom nplua nuj, huas ub huas no kom lub neej nto ntsis.

Txawm peb yuav muab tag nrho peb txoj sia los nrhiav tej cuab tam kho peb lub neej kom luag lwm tus thiaj tig los nyiam peb, tsis kav peb yuav pom tias tsis muaj ib yam qab hau dab tsi li. Tus poj niam tsob ntshav los kuj zoo li ntawd.

Thaum kawg nws hnov luag cav txog Huab Tais Yes Xus, ces nws thiaj xav ntsib Huab Tais Yes Xus, kom nws tau kov Huab Tais Yes Xus, mas tej zaud nws qhov mob yuav zoo hlo.

Vaj Qhia rov hais tias Tswv Ntuj tos peb tig los nrhiav nws. tos peb qhib peb lub siab rau Huab Tais Tswv Ntuj tib yam li tus poj niam tsob ntshav ntawd.

Thaum Huab Tais Yes Xus hnov tias nws lub hwj chim tawm ntawm nws mus lawm, mas Huab Tais Yes Xus xam nrhiav saib yog leej twg ua rau nws lub hwj chim tawm mus li ntawd.

Muaj neeg coob coob ntsauv Huab Tais Yes Xus, lawv txiv Huab Tais Yes Xus thiab kov Huab Tais Yes Xus. Tiam sis Huab Tais Yes Xus nrhiav tus neeg muab lub siab ntseeg.

Huab Tais Yes Xus tsis xav txog neeg kev txhaum yav dhau los, Huab Tais Yes Xus xav txog neeg lub siab ntseeg. Li ntawd, Huab Tais Yes Xus thiaj hais rau tus poj niam tsob ntshav uas luag tej hais tias muaj txhaum tias “Me ntxhais, koj lub siab ntseeg cawm koj lawm. Koj rov mus kaj siab lug, koj tus mob zoo lawm.”

Kawg no, Vaj Qhia Fas Ntshis Kus thiaj hais rau sawv daws tias “Nej cia Huab Tais Yes Xus saib nej thiab cawm nej lub siab.”

Thaum peb tau kev cawm ntawm Huab Tais Yes Xus lawm, peb yuav tig saib cov neeg nyob ib ncig peb uas lawv tab tom raug txom nyem thiab nrhiav kev nyiam.

“Vim tias Huab Tais Yes Xus xav kom koj txhob ntsia neeg sab nraud xwb, koj yuav ntsia hauv neeg lub siab. Vim kev saib tsis yog kom koj txiav txim rau lwm tus, tab sis yog kom koj txais lawv ua koj tseem phooj ywg.”

“Vim kev nyiam xwb thiaj yuav cawm txoj sia tau.”