TSWV NTUJ HLOOV PEB TXOJ SIA LO TXHAUM KOM PEB TAU MUS TSHAJ NTUJ LUS RAU LWM TUS

Hnub Plaub tim 30 lub 6 hli 2021, Vaj Qhia Fas Ntshis Kus nthuav cov ntsiab lus hauv Paj Lug tsab ntawv sau ntuas cov ntseeg hauv Nkas Las Tias thiab Tswv Ntuj lub txiaj ntsim hloov Xaus tus hiam cov ntseeg kom ua ib tug Hauv Paus Xa Lus mus rau pej kum neeg.

Vaj Qhia hais tias Paj Lug tsab ntawv no mas peb pom txog Paj Lug lub tswv yim tshaj lub Moo Zoo kom cov ntseeg hauv Nkas Las Tias muaj ib lub siab ruaj nreb hauv lawv txoj kev ntseeg.

Paj Lug tau tso tej lus sib cav txog txoj cai pov tseg, Paj Lug qhia txog hau kev yeej kev sib cov nyom.

Ua ntej Paj Lug tsab ntawv yuav xaus, Paj Lug tau hais txog kev sib cav txog txoj cai txiav tias cov ntseeg txog Yes Xus puas yuav txais lub cim txiav.

Paj Lug xav qhia txog yam tob hauv txoj kev ntseeg: yog qhov tseeb hauv lub Moo Zoo thiab cov ntseeg kev twj lij.

Vaj Qhia hais tias Paj Lug ntsia pom tej teeb meem tshwm sim hauv pawg ntseeg nyob Nkas Las Tias.

Paj Lug hais rau cov ntseeg hauv Nkas Las Tias tias nws tau ua ib tug Hauv Paus Xa Lus vim Tswv Ntuj xaiv nws, tsis yog vim nws txoj hmoov zoo.

Vaj Qhia piav ntxiv tias tos Paj Lug khav tias nws yog ib tug txuag cov Yus Das li kev cai thiab yog ib tug tau hiam cov ntseeg txog Yes Xus ntau dua lwm tus, vim Paj Lug xav qhia tsoom ntseeg tias Tswv Ntuj kev khuv leej neeg loj tas nrho.

Txawm tias yav tas los Paj Lug muaj txhaum ntau, tsis kav Tswv Ntuj xaiv Paj Lug ua tus tshaj lub Moo Zoo rau pej kum neeg. Vim li no, Vaj Qhia thiaj xav ntuas sawv daws tias “Yog peb tig ntsia txog Tswv Ntuj kev hu peb los ua ib tug neeg ntseeg, mas peb yuav pom tias Tswv Ntuj txoj kev npaj tseg ntawd xws li yuav tsis txaus ntseeg pes tsawg.”

Yog peb muab xav mas yuav pom tias Tswv Ntuj qhia nws lub siab rau cov neeg txhaum thiab tsis muaj zog. Tej yam no tsis yog tej xwm lam tshwm tuaj, tiam sis yog tej xwm Tswv Ntuj twb npaj tseg cia tas lawm. Tsuas yog peb puas yuav ua raws li Tswv Ntuj npaj tseg cia rau peb los tsis ua.

Kawg no, Vaj Qhia ntuas tias thaum Tswv Ntuj hu peb los yog xaiv peb, mas Tswv Ntuj tau cog ib txoj hauj lwm tshaj Ntuj Lus nyob hauv peb thiab peb tsum siv zog tiag tiag ua txoj hauj lwm no.